OpenAI GPT-5 süni intellekt modelini istifadəyə verdi

OpenAI şirkəti indiyədək hazırlanmış ən ağıllı, ən sürətli və ən funksional süni intellekt modeli olan GPT-5-i ictimaiyyətə təqdim edib.

E-huquq.az xəbər verir ki, bu barədə şirkətin yaydığı rəsmi məlumatda bildirilir.

Məlumata görə, GPT-5 modeli riyaziyyat, yazı, sağlamlıq, vizual qavrayış və digər sahələrdə yüksək performans nümayiş etdirir. Açıqlamada qeyd olunub ki, yeni model bütün istifadəçilər üçün əlçatan olsa da, “Plus” abunəçiləri geniş imkanlara, “Pro” abunəçiləri isə daha təkmilləşdirilmiş və dəqiq cavablar üçün “GPT-5 Pro” versiyasına çıxış əldə edəcəklər.

Bildirilib ki, GPT-5 bu günə qədər təqdim edilmiş ən güclü kodlaşdırma modelidir. Xüsusilə mürəkkəb frontendlərin yaradılması və böyük həcmli kod bazalarının idarə olunmasında ciddi irəliləyiş təmin edir.

OpenAI GPT-5-in həmçinin zövqlə dizayn edilmiş, interaktiv və intuitiv veb-saytlar, tətbiqlər və oyunlar yaratmaq imkanına malik olduğunu vurğulayıb. Yeni model ideyaları daha sürətli və yaradıcı şəkildə reallaşdırmağa şərait yaradır.

Bundan əlavə, inkişaf etdirilmiş yazı qabiliyyəti sayəsində GPT-5 gündəlik işlərdə – hesabatların hazırlanması, e-poçt yazışmaları, qeydlərin aparılması və digər mətn əsaslı tapşırıqlarda istifadəçilərə effektiv dəstək göstərir.

Qeyd edək ki, “Microsoft” da GPT-5 modelini öz məhsullarına inteqrasiya edəcəyini açıqlayıb.

Humay Eminqızı