Dələduzluqda təqsirləndirilən qadına hökm oxundu

Dələduzluqda təqsirləndirilən Ofelya Həsənovanın cinayət işi üzrə məhkəmənin yekun iclası baş tutub.

E-huquq.az xəbər verir ki, Bakı Ağır Cinayətlər Məhkəməsində hakim Səbinə Məmmədzadənin sədrliyi ilə keçirilən prosesdə dövlət ittihamçısı çıxış edib.

O, təqsirləndirilən şəxsə daha öncə təyin olunmuş 5 il azadlıqdan məhrumetmə cəzası ilə hazırki cəzası toplanmaqla onun qəti olaraq 9 il müddətinə azadlıqdan məhrum edilməsini təklif edib.

Mülki iddiaya münasibət bildirən O.Həsənova iddianı qəbul etməyib: "20 min manat almışam, onu da ödəməyə hazıram. 118 min 708 manat mülki iddianı qəbul etmirəm və ödəməyəcəm".

Məhkəmə müşavirəyə gedib. Daha sonra hökm oxunub. Hökmə əsasən, O.Həsənova 7 il maddətinə azadlıqdan məhrum edilib.

Mülki iddia qismən təmin edilib. Belə ki, zərərçəkmiş şəxsə 103 min manat ödəniləcək.

Qeyd edək ki, O.Həsənovaya qarşı Cinayət Məcəlləsinin 178.3.2-ci maddəsi (dələduzluq külli miqdarda ziyan vurmaqla törədildikdə) üzrə cinayət işi açılıb. O, zərərçəkmiş şəxsə 118 min 708 manat ziyan vurmaqda təqsirləndirilib.

Humay Eminqızı