Vəkil: "Xarici qərarların tanınmasında Ali Məhkəmə tərəfindən şəffaflıq və tam neytrallıq təmin olunur"

Azərbaycan Respublikası Ali Məhkəməsində xarici məhkəmə qərarlarının tanınması ilə bağlı müsbət irəliləyişlər müşahidə olunur.

E-huquq.az xəbər verir ki, bunu vəkil Fərid Nəbili bildirib.

O, son iki ildə Azərbaycanda xarici məhkəmə qərarlarının tanınması ilə bağlı bəzi müşahidələrini bölüşüb.

Vəkil deyib ki, ​Ali Məhkəmədə daha şəffaf və təkmilləşdirilmiş hüquqi prosedurlar və iclaslar keçirilir: "Hətta dövlət müəssisələrinin iştirak etdiyi işlərdə belə neytrallığın və ədalətliliyin artması çox vacib bir irəliləyişdir. Məsələn, tanınma işlərimizdən birində, dövlət şirkətinə qarşı 20 milyon AZN məbləğində olan qərar Azərbaycan Ali Məhkəməsi tərəfindən tanınıb".
​
F.Nəbili məsələ ilə bağlı öz təklif və tövsiyələrini də qeyd edib.

"Məhkəmə iclaslarının rəsmi dayandırılması anlayışı tətbiq edilmir ki, bu da rəsmi dayandırma qərarı olmadan iclasların təkrarən və uzun müddətə təxirə salınmasına səbəb ola bilər. ​Məsələn, bizim işlərimizdən birində təxminən 5 ay müddətində belə dinləmələr dəfələrlə təyin olunub.

Tanınmadan sonrakı icra prosesi zamanı müəyyən faktların dəyişməsi ehtimalına qarşı ləğvetmə sərəncamı imkanı potensial qoruyucu vasitə kimi nəzərə alınmalıdır. Buna görə də gələcəkdə baş verə biləcək dəyişikliklərlə bağlı həddindən artıq məhkəmə ehtiyatlılığı tanınma konsepsiyasına xələl gətirə bilər.

Xaricdə baş verən işin və əlaqəli hadisələrin əsasları geniş yenidən nəzərdən keçirilməməlidir. Belə məsələlərə baxıldıqda arqumentlər potensial imtina üçün açıq şəkildə real zəmin yaratmalıdır".

Şəbnəm Mehdizadə