Məhkəmə elektron və elektrik məhsulları satan şirkəti 5584 manat məbləğində cərimələdi

Azərbaycan Maliyyə Bazarlarına Nəzarət Palatası “Xəzər Elektron” MMC barəsində inzibati xəta haqqında protokol tərtib edib.

E-huquq.az-ın xəbərinə görə, Palata tərtib etdiyi protokolu baxılması üçün Səbail Rayon Məhkəməsinə göndərib.

Məhkəmə şirkətin İnzibati Xətalar Məcəlləsinin 430.4-cü (Avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir) maddəsi ilə təqsirli bilərək, 5584 manat məbləğində cərimə edilməsi barədə qərar çıxarıb.

Qərardan narazı qalan MMC apellyasiya şikayəti verib. İşə Bakı Apellyasiya Məhkəməsində baxılır.

Qeyd edək ki, əsası 2002-ci ildə qoyulmuş “Xəzər Elektron” MMC Azərbaycanın elektron və elektrik məhsulları bazarının satış, xidmət sahələrində qabaqcıl şirkətlərdən biridir.