İlk dəfə vəkilliyə namizədlərin onlayn andiçmə mərasimi keçirildi

Bu gün Vəkillər Kollegiyasının Rəyasət Heyətinin növbəti iclası keçirilib.

E-huquq.az-ın məlumatına görə, Nazirlər Kabineti yanında Operativ Qərargahın tövsiyələrinə uyğun olaraq onlayn şəkildə keçirilən iclası giriş sözü ilə açan Kollegiyanın sədri Anar Bağırov iclas iştirakçılarına Kollegiyanın cari fəaliyyəti barədə məlumat verib və bildirib ki, bu gün and içəcək vəkilliyə namizədlərlə birlikdə Vəkillər Kollegiyası üzvlərinin sayı 1783 nəfərə çatacaqdır. Eyni zamanda, cənab sədr çıxışında “Sosial sığorta haqqında” Qanunda dəyişiklik edilməsi barədə” Azərbaycan Respublikasının 8 may 2020-ci il tarixli Qanunu ilə vəkillərin gəlirlərindən məcburi dövlət sosial sığorta haqqı üzrə tutulma faizinin xərclər çıxılmaqla, 10 faiz miqdarında müəyyən edilməsinin vəkillik üçün əhəmiyyətindən bəhs edilib.

Bununla yanaşı, iclasda vəkillik fəaliyyəti zamanı qeyri-prosessal münasibətlərə yol açan, habelə korrupsiya hüquqpozmaları və ya korrupsiyaya şərait yaradan hüquqpozmalarla nəticələnə bilən hər bir hərəkətin yolverilməz olduğu xüsusilə qeyd edilməklə, vəkil qurumları və bütün vəkillər tərəfindən bir sıra məsələlərin diqqətdə saxlanılması zəruri hesab edilib.

Xüsusilə, hüquqi yardım üçün müraciət etmiş şəxslərin hüquq və mənafelərinin müdafiəsi (təmsil edilməsi) baxımından tapşırıq (müqavilə) münasibətləri yaranarkən müştəri tərəfindən vəkilə ödənilməli olan qonorar məbləğinin tam şəkildə və nağdsız qaydada ödənişinin təşkil olunması; Göstərilən hüquqi yardım çərçivəsində müştərilərdən hər hansı məbləğdə nağd qaydada və ya işin dolayı yolla “həlli”nə yönəlmiş “məqsədlər” üçün müştərindən nağd və ya nağdsız qaydada vəsaitin alınmasının (tələb edilməsinin) yolverilməzliyinə hər zaman riayət olunması; Vəkil qurumlarının rəhbərləri tərəfindən vəkillə müştərinin müqavilə münasibətlərində iştirak zamanı müqavilə məbləğlərinin düzgün təsbit olunmasına ciddi surətdə diqqət yetirilməsi; Qanunvericiliklə nəzərdə tutulan ödənişlərin (tutulmaların) vaxtında ödənilməsi; Vəkil tərəfindən göstərilən hüquqi yardıma görə əldə edilən mədaxildən bu fəaliyyət üçün çəkilmiş xərclər (üzvlük haqqı, saxlanma xərcləri, köçürmələr, vəkil köməkçisinə ödənişlər, vəkillik fəaliyyəti ilə əlaqəli və elektron-qaimə faktura ilə təsdiq olunan digər xərclər) çıxıldıqdan sonra qalan fərqdən məcburi dövlət sosial sığorta haqqının və gəlir vergisinin hesablanıb tutulması; Vəkillərin mənafeyi baxımından ədalət prinsipinin təmin edilməsi məqsədilə vəkil qurumlarının saxlanma xərclərinə yenidən baxılmaqla həmin xərclərin məbləğlərinin bütün vəkil qurumlarında müəyyən mənada bərabərləşdirilməsinə nail olunması; Qarşıya çıxan qeyri-prosessual münasibətlərlə əlaqədar neqativ hallar və hüquqpozmalar barədə dərhal təxirəsalınmaz preventiv tədbirlərin görülməsi və bu barədə Vəkillər Kollegiyasının Rəyasət Heyətinə məlumat verilməsi tövsiyə olunub.

Sonra vəkilliyə qəbul üzrə ixtisas imtahanlarından müvəffəqiyyətlə keçmiş və icbari təlimi başa vurmuş namizədlərin andiçmə mərasimi keçirilmiş, vəkilliyə namizədlər and içib.

Daha sonra, yeni vəkillər çıxış etmiş, vəkil peşəsini seçdikləri üçün məmnun olduqlarını, vəkilliyə qəbul üzrə ixtisas imtahanlarının intensiv olaraq keçirilməsi üçün Vəkillər Kollegiyasının Rəyasət Heyətinə minnətdar olduqlarını bildirib.

Bundan əlavə, iclasda “Vəkillər Kollegiyası üzvlüyünə qəbulla bağlı ixtisas imtahanlarının keçirilməsi Qaydaları”nda dəyişiklik edilməsi, vəkillərin fəaliyyət göstərdikləri qurumdan başqa quruma keçmələri, bir sıra vəkillərin mükafatlandırılması ilə bağlı məsələlərə baxılaraq müsbət qərar verilmiş, eləcə də hüquqi yardıma görə vəkil qurumuna (vəkilə) ödənilən haqqın nağdsız qaydada ödənilməsi prosedurları ilə bağlı “Hüquqi yardımın göstərilməsi haqqında müqavilə”nin nümunəvi formasına müvafiq dəyişiklər təsdiq edilib.

İclasda, həmçinin, Azərbaycan vəkilliyinin yubiley tədbirləri çərçivəsində keçirilən foto və ədəbi müsabiqələrin qalibləri elan olunub. Fotomüsabiqə üzrə 1-ci yerə vəkil Asif Abdullayev, 2-ci yerə vəkil Nurlana Məmmədova, 3-cü yerə vəkil Arslan Mikayılov, ədəbi müsabiqə üzrə isə 1-ci yerə Şair Abduləzizli, 2-ci yerə vəkil Xəlil Məmmədli, 3-cü yerə vəkil Xədicə Bayramlı layiq görülüb.

Müsabiqələrin qalibləri, müvafiq olaraq 1-ci yer üçün 300 manat, 2-ci yer üçün 200 manat, 3-cü yer üçün isə 100 manat məbləğində pul mükafatı və diplomlarla ilə təltif olunub.

Sonda Vəkillər Kollegiyasının fəaliyyəti ilə əlaqədar əhəmiyyət kəsb edən sair məsələlərə baxılıb.