"Bunu bütün vəkillərdən narazılıq kimi təqdim etmək kimə və nə üçün lazımdır?!"

Azərbaycan Respublikası Vəkillər Kollegiyasının sədri Anar Bağırov KİV nümayəndələrinə müraciət edib.

E-huquq.az-ın məlumatına görə, A.Bağırov müraciətində Ali Məhkəmənin sədri Ramiz Rzayevin Vəkillər Kollegiyasının Rəyasət Heyətinə göndərdiyi məktubla bağlı müzakirələrə münasibət bildirib.

"Hörmətli jurnalistlər, çox təşəkkür edirəm!

Kollegiyanın ümumi fəaliyyətinə, habelə vəkil qurumlarına və fərdi vəkillərə göndərdiyim xidməti məktubuma belə həssaslıqla yanaşırsınız.

Məlum olduğu kimi, ölkədə 1844 nəfər vəkil var, barmaqla sayılası bir neçə kassasiya və əlavə kassasiya şikayətində diqqətsizlik olub, səhv aşkarlanıb. Bunu bütün vəkillərdən narazılıq kimi təqdim etməklə məsələni təhrif etmək kimə və nə üçün lazımdır?!

Nəzərə alın ki, məhz bizim vəkillərimizin şikayətləri əsasında hər il müxtəlif instansiya məhkəmələrin qəbul etdikləri minlərlə qətnamə, qərardad, qərar və hökmlər tam və ya qismən ləğv olunur, dəyişdirilir.

Bəzən 3 hakimdən ibarət məhkəmə tərkibinin qərarı bir vəkilin əsaslı şikayəti əsasında ləğv olunur. Təbii ki, heç vaxt razı olmaram ki, bu, hakimlərin peşəkarlığının aşağı səviyyəsi ilə izah olunsun və cəmiyyətə bu cür təqdim edilsin. Səhv mümkündür və heçkəs səhvdən sığortalanmayıb.

İşçi qaydada yazışmanı və peşədaxili müzakirəni başqa istiqamətdə təhrif etmək qəti şəkildə yolverilməzdir. Bunu peşəkar jurnalistikaya yaraşdırmıram və bu məlumatı KİV-ə göndərən vəkil həmkarları daha məsuliyyətli olmağa, peşə maraqlarını şəxsi maraqlara qurban verməməyə və ciddiyyətə dəvət edirəm", - deyə Kollegiya sədri qeyd edib.