"Vəkil sorğularının elektron formada əldə olunması üzrə Ədliyyə Nazirliyi ilə işlər davam etdirilməkdədir. “Davamlı tədris üzrə” elektron platforma isə yaxın zamanda vəkillərin istifadəsinə təqdim olunacaq".
E-huquq.az-ın məlumatına görə, bunu Vəkillər Kollegiyasının sədri Anar Bağırov "Vəkillərin "Elektron məhkəmə" informasiya sistemindən səmərəli istifadəsi" mövzusunda keçirilən konfransda deyib.
O, vəkillikdə innovasiyaların tətbiqi – elektron xidmətlər barədə tədbir iştirakçılarına məlumat verib. Sədr bildirib ki, vətəndaşların hüquqi yardıma çatımlılığını təmin etmək üçün Vəkillər Kollegiyasının veb-saytında bütün vəkil qurumlarının və vəkillərin onlayn reyestri yaradılıb: "Həmçinin hər bir vəkil üçün elektron kabinet istifadəyə verilib, Kollegiyanın rəsmi sənədləri və vəkillərə aid sənədlər həmin bölmədə yerləşdirilib. 2020-ci ildə pandemiya səbəbilə karantin rejimi nəzərə alınmaqla, "LegalAid" elektron hüquqi yardım mobil tətbiqi hazırlanaraq vətəndaşların istifadəsinə verilib".
A. Bağırov eyni zamanda qeyd edib ki, artıq ödənişsiz hüquqi yardımlar – Pro Bono-lar ənənəvi qayda ilə yanaşı həmçinin onlayn qaydada da aparılır: "Həmçinin Vəkillər Kollegiyası Rəyasət Heyəti Aparatı daxilində sənəd mübadiləsinin elektronlaşdırılıb".
Onun sözlərinə görə, ötən dövrdə vəkilliyə qəbulla bağlı sənəd qəbulu elektronlaşdırılıb: "Belə ki, ixtisas imtahanının yazılı test mərhələsinə sənədlər ənənəvi qayda ilə yanaşı onlayn qaydada da qəbul edilir. Eyni zamanda dövlət hesabına göstərilən hüquqi yardımlarla bağlı qərarlar məhkəmələrdən HYTM-ə onlayn qaydada göndərilir. Bu qərarlar həmçinin HYTM-dən bürolara və fərdi vəkillərə VK-nın saytdındakı şəxsi kabinet vasitəsilə onlayn qaydada göndərilir".
