Ağız bakteriyaları infarktlara səbəb ola bilər

Finlandiyada aparılan yeni bir araşdırma, ağızda tapılan bəzi bakteriyaların birbaşa infarktlara səbəb ola biləcəyini ortaya qoyub.

E-huquq.az xarici mətbuata istinadən xəbər verir ki, Tampere Universitetinin rəhbərlik etdiyi tədqiqatda ürək-damar xəstəliyi olan 200-dən çox xəstənin damar lövhələri araşdırılıb.

Elm adamları bu lövhələrin əhəmiyyətli bir hissəsində ağız bakteriyasının genetik izlərini tapıblar.

"Koronar arteriya xəstəliyində bakteriyaların rolu çoxdan şübhə altına alınsa da, indiyədək birbaşa və inandırıcı dəlillər yoxdur", - deyə tədqiqata rəhbərlik edən Pekka Karhunen bildirib.

"Tədqiqatımız bir çox ağız bakteriyalarının DNT-sinin damar lövhələrində tapıldığını göstərdi", - o əlavə edib.

Tədqiqatın diqqət mərkəzində infarktların əsas səbəblərindən biri olan ateroskleroz olub. Bu xəstəlik zamanı damarların divarlarında yağ, xolesterin, kalsium və digər maddələrdən ibarət lövhələr əmələ gəlir. Zamanla damarlar daralır, qan axını maneə törədir, bəzən lövhə qoparaq ürək əzələsinə oksigeni kəsir.

121 qəfil ölüm hadisəsi və 96 cərrahi xəstənin nümunələri üzərində aparılan testlərdə tez-tez "viridans streptokoklar" kimi tanınan ağız bakteriyaları aşkar edilib. Bu bakteriyalar ani ölüm yaşayanlarda 42,1 faiz, əməliyyat edilənlərdə isə 42,9 faiz damar lövhələrində aşkar edilib.

Bakterial biofilmlərin adətən immun sistemindən gizlənən damar lövhələrinin mərkəzində tapıldığı aşkar edilib. Tədqiqatçılar qeyd edirlər ki, bu səssiz bakteriyalar stress, pis qidalanma, tənəffüs yoluxucu xəstəliklər və ya müəyyən hormonların təsiri altında alovlana bilər, bu da lövhənin yırtılmasına və infarkt keçirməsinə səbəb olur.

Nəticələr göstərir ki, ağız sağlamlığı ürək sağlamlığı ilə əvvəllər düşünüldüyündən daha güclü şəkildə bağlıdır.

Tədqiqatçılar belə nəticəyə gəliblər: "Bizim tapıntılarımız göstərir ki, ağız bakteriyaları sabit damar lövhələrinin zamanla qopmağa meyilli olmasında rol oynaya bilər və bu da infarkt riskini artırır".

Araşdırma "Journal of the American Heart Association" jurnalında dərc olunub.

Şəbnəm Mehdizadə