"Azərikard"a üzv bankların müştərilərinə təsir edən texniki nasazlıq aradan qaldırıldı - YENİLƏNDİ

Bu gün "Azərikard" MMC-yə üzv olan bir sıra bankların müştərilərinin hesablarından vəsaitlərin təkrar silinməsi məsələsi ilə bağlı bildirilir ki, sözügedən insident hər-hansı kibermüdaxilə və ya dələduzluq halları ilə bağlı deyil, texniki səbəblərdən baş verib.

Bu barədə e-huquq.az-a Azərbaycan Mərkəzi Bankından (AMB) bildirilib.

"Əhalinin diqqətinə çatdırılır ki, AMB-nin ödəniş sistemlərinin, eləcə də ölkədə fəaliyyət göstərən prosessinq mərkəzlərinin və kommersiya banklarının informasiya sistemləri və ödəniş infrastrukturunun sabitliyi, davamlılığı və etibarlılığı ilə əlaqədar hər-hansı çətinlik müşahidə olunmur.

Qeyd olunan texniki nasazlıq aidiyyəti üzrə artıq aradan qaldırılıb", - açıqlamada deyilir.

Bildirilir ki, bank xidmətləri müştərilərindən yalnız rəsmi mənbələrdə əks etdirilən məlumatlara istinad edilməsi xahiş olunur

***

15:21

Azərbaycan Beynəlxalq Bankı (ABB) tərəfindən kart əməliyyatlarında texniki nasazlıq yarandığı barədə açıqlama verilib.

E-huquq.az xəbər verir ki, bu barədə bankın mobil tətbiqi vasitəsilə istifadəçilərə göndərilən bildirişdə qeyd olunub.

"Hazırda 3-cü tərəfli yaşanan texniki çətinliklə bağlı kartlarda əlavə vəsait silinməsi baş vermişdir. Problem yaxın zamanda aradan qaldırılacaq", - deyə bildirilib.

Bank baş verən vəziyyətlə əlaqədar müştərilərdən anlayış göstərmələrini xahiş edib və problemin qısa zamanda həll ediləcəyini vurğulayıb.