Baş Prokurorluq hakim Fəqan Əhmədovun vəkillərinin mediaya açıqlamasına münasibət bildirib.
Qurumdan e-huquq.az-ın sorğusuna cavab olaraq bildirib ki, cinayət işi üzrə intensiv istintaq hərəkətləri aparıldığı hazırkı dövr ərzində hər hansı açıqlamanın verilməsi istintaqın gedişatına təsir kimi qəbul ediləcək:
“Odur ki, Baş Prokurorluq bu kimi hərəkətlərdən çəkinməyi tövsiyə edir”.
Qeyd edək ki, vəkil Bəylər Məmişov e-huquq.az-a açıqlamasında Fəqan Əhmədovun həyat yoldaşını guya qəsdən öldürməsi ilə bağlı məlumatların həqiqətə uyğun olmadığını deyib. O qeyd edib ki, hadisə zarafat zəminində baş verib. Vəkil Fəqan Əhmədovun odlu silahla ehtiyasız davrandığını bildirib.
Xatırladaq ki, Baş Prokurorluğun Mətbuat xidmətindən verilən məlumata görə, Əhmədov Fəqan Rövşən oğlunun özünə məxsus ov tüfəngindən atəş açaraq Pərvanə Əhmədovanı qəsdən öldürməsinə əsaslı şübhələr müəyyən edilib.
Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə Sabunçu rayon prokurorluğunda başlanan cinayət işi üzrə istintaqın aparılması Baş Prokurorluğun rəhbərliyinin göstərişinə əsasən Baş Prokurorluğun İstintaq idarəsində tapşırılıb.
Fəqan Əhmədov şübhəli şəxs qismində istintaqa cəlb edilib.
Hazırda iş üzrə zəruri istintaq tədbirləri davam etdirilir.
