ABŞ-nin dövlət katibi Ukraynanın paytaxtı Kiyevə səfəri çərçivəsində Prezident Volodimir Zelenski ilə görüşüb.
E-huquq.az xəbər verir ki, bu barədə Dövlət Departamentinin mətbuat xidməti məlumat yayıb.
Qeyd olunub ki, görüşdə Zelenski ABŞ-nin Ukraynaya göstərdiyi yardıma, xüsusən energetika sahəsindəki köməyə görə Blinkenə təşəkkürünü bildirib. Prezident qeyd edib ki, Ukraynanı ağır qış gözləyir, lakin o əmindir ki, ukraynalılar bu sınaqdan keçə biləcəklər.
Blinken, öz növbəsində, Zelenski və komandasını görməyə şad olduğunu vurğulayıb. Onun sözlərinə görə, ABŞ Prezidenti Cozef Bayden Amerikanın Ukraynaya dəstəyini təsdiqləmək, o cümlədən ölkəsinin səylərini maksimuma qaldırdığını bildirmək üçün Kiyevə səfər etməsini istəyib.
Diplomat vurğulayıb ki, ABŞ Ukraynanın əks-hücumunda böyük irəliləyiş görür. Dövlət katibi həmçinin deyib ki, Bayden ukraynalı həmkarı ilə görüşəcəyini gözləyir.
Xatırladaq ki, sentyabrın 6-da ABŞ-nin dövlət katibi Entoni Blinken Kiyevə işgüzar səfərə gəlib. Amerikalı diplomatın sözlərinə görə, səfərin məqsədi Ukrayna Silahlı Qüvvələrinin əks-hücum əməliyyatında irəliləyiş fonunda Ukraynaya sarsılmaz dəstəyi nümayiş etdirməkdir.
