İspaniya İsraili tərk etmək üçün müraciət edən 429 nəfəri təxliyə edib.
E-huquq.az xəbər verir ki, bu barədə İspaniya Müdafiə Nazirliyindən məlumat verilib.
Bildirilib ki, ötən gün Təl-Əvivə göndərilən 2 təyyarə ilə təxliyə edilən 429 nəfər Madriddəki "Torrejon de Ardoz" hərbi hava bazasına gətirilib.
Təxliyə edilənlərdən 334-ü İspaniya, 41-i Latın Amerikası, 22-si Avropa ölkələri, 32-si isə digər ölkələrin vətəndaşlarıdır. Onları İspaniyanın xarici işlər naziri Xose Manuel Albares qarşılayıb.
İspaniyanın "El Mundo" qəzetinin məlumatına görə, oktyabrın 10-da başlayan təxliyə əməliyyatı başa çatıb.
Qeyd edək ki, İspaniyanın İsraildəki səfirliyi oktyabrın 10-da "X" platformasında paylaşım edərək İsraili tərk edə bilməyən vətəndaşlarından onlarla əlaqə saxlamasını xahiş etmişdi.
Şəbnəm Mehdizadə
