Ukraynalı qaçqınların Aİ-də müvəqqəti müdafiəsi daha bir il uzadılıb

Avropa İttifaqı (Aİ) Ukraynalı qaçqınların müvəqqəti müdafiəsini uzadıb.

E-huquq.az UNİAN-a istinadən xəbər verir ki, Avropa İttifaqı Şurası Rusiya-Ukrayna müharibəsində Aİ-yə sığınan 4 milyondan çox ukraynalının müvəqqəti müdafiəsinin 2027-ci il martın 4-dək uzadılması ilə bağlı Avropa Komissiyasının təklifini dəstəklədiyini bildirib.

“Rusiya hava zərbələri ilə Ukrayna vətəndaşlarına qarşı terror etməkdə davam edərkən, Aİ Ukrayna xalqı ilə həmrəyliyini nümayiş etdirməkdə davam edir. Biz daha bir il milyonlarla ukraynalı qaçqına müdafiə təklif etməyə davam edəcəyik. Polşa Sədrliyi həmçinin sülh əldə edildikdən sonra müvəqqəti müdafiənin tədricən dayandırılması strategiyasının müzakirəsinə başlayıb. Yaxın gələcəkdə biz bu sahədə, o cümlədən Ukraynaya qayıtmaq kontekstində Aİ-nin birgə, ümumi qərarları istiqamətində çalışacağıq”, - Polşanın daxili işlər naziri Tomaş Siemonyak vurğulayıb.

Humay Eminqızı