Rusiyanın son hücumlarında azı 15 nəfər ölüb, 75 nəfər yaralanıb

Rusiya ordusunun Ukraynaya raket və pilotsuz uçuş aparatlarının (PUA) hücumu nəticəsində azı 15 nəfər ölüb, 75 nəfər isə yaralanıb.

E-huquq.az xəbər verir ki, bu barədə Ukrayna prezidenti Volodimir Zelenski məlumat verib.

Zelenski rusların gecə saatlarında paytaxt Kiyev, Odessa, Çerniqov, Nikolayev, Jitomir, Kirovoqrad və Zaporojye bölgələrinin hədəf alındığını bildirib.

Rusların 440-dan çox İHA və 32 raketlə hücum etdiyini bildirən Zelenski, bunu Kiyevə edilən ən dəhşətli hücumlardan biri kimi qiymətləndirib.

Kiyevin 8 fərqli rayonunda dağıntıların olduğunu söyləyən Zelenski dağıntılar altından insanların xilas edilməsi üçün işlərin davam etdiyini qeyd edib.

O, Odessa şəhərində axtarış-xilasetmə işlərinin davam etdiyini vurğulayıb.

Zelenski ölkəsinə edilən hücumları "terror hücumu" kimi qiymətləndirib.

Şəbnəm Mehdizadə