İngiltərəli alimlər mumiyaların tərkibini öyrənmək üçün yeni metoddan istifadə edib

İngiltərənin Bristol Universitetinin üzvi geokimyaçıları qədim Misir mumiyalarının tərkibini öyrənmək üçün yeni metod sınaqdan keçirib.

E-huquq.az xarici KİV-ə istinadən xəbər verir ki, tədqiqatçılar mumiyalara toxunmadan onların yaydığı qoxu molekullarını analiz etməyə çalışıb.

Ənənəvi üsullarda mumiyaların sarğıları kəsilərək təhlil edilirdi. Bu isə həm mumiyanın bütövlüyünü pozur, həm də molekulların parçalanmasına səbəb olurdu.

Yeni metod, mumiyanı əhatə edən havadan uçucu üzvi birləşmələri (VOC) nümunələrini götürərək istifadə olunan materialları müəyyən edir.

Araşdırma nəticəsində məlum olub ki, qədim mumiyalar fərqli dövrlərdə müxtəlif qoxu tərkiblərinə sahib olub. Erkən dövrlərdə sadə heyvan və bitki yağları, sonralar isə ardıc, şam və sidr kimi bitki yağları ilə zənginləşdirilmiş qarışıqlar istifadə edilib.

Tədqiqatçılar bu yeni üsulun mumiyaların xronoloji təsnifatı üçün sürətli və dağıdıcı olmayan bir metod ola biləcəyini bildirirlər.

Şəbnəm Mehdizadə