İstiləşən torpaq karbonu atmosferə qaytara bilər - ARAŞDIRMA

Alimlərin 37 il ərzində apardıqları təcrübə iqlim dəyişikliyi ilə bağlı diqqətçəkən bir faktı üzə çıxarıb.

E-huquq.az xarici KİV-ə istinadən xəbər verir ki, istiləşən torpaq əvvəllər uzun müddət ərzində təcrid olunmuş vəziyyətdə qaldığı güman edilən karbonu parçalamağa başlayıb.

Bu təcrübə qlobal istiləşmənin gələcəkdə daha da sürətlənə biləcəyi ilə bağlı narahatlıq doğurur.

Tədqiqat ABŞ-nin Massaçusets ştatındakı Harvard Meşəsi ərazisində aparılıb. Alimlər 37 il ərzində müəyyən torpaq sahələrinin temperaturunu ətrafdakı təbii temperaturdan təxminən 5 dərəcə yüksək səviyyədə saxlayıblar.

Eksperimentin məqsədi temperatur artımının meşə torpağındakı üzvi maddələrə və karbona uzunmüddətli perspektivdə necə təsir etdiyini müşahidə etməkdən ibarət idi.

İlk illərdə daha asan parçalanan karbon miqdarında azalma müşahidə olunub. Lakin tədqiqatın dördüncü onilliyində əvvəllər davamlı hesab edilən karbon komponentlərinin də parçalanmağa başladığı müəyyən edilib. Torpaqdakı üzvi maddələr mikroorqanizmlər tərəfindən parçalandıqda, karbon karbon qazı şəklində atmosferə qayıdır.

Tədqiqatçıların fikrincə, yüksələn temperatur torpaqdakı mikrob icmalarının fəaliyyətini dəyişdirməklə karbon itkisini sürətləndirə bilər.

Şəbnəm Mehdizadə