Baş prokurorun peşəkar fəaliyyətinə Prezidentdən yüksək qiymət

19 noyabr 2025-ci il tarixində Azərbaycan Respublikasının Prezidenti, cənab İlham Əliyev tərəfindən imzalanmış Sərəncamla Baş prokuror Kamran Əliyev 1-ci dərəcəli "Vətənə xidmətə görə" ordeni ilə təltif olunub. Bu təltif, yalnız bir dövlət məmurunun mükafatlandırılması deyil, eyni zamanda ölkənin hüquq mühafizə orqanlarında aparılan islahatların, prokurorluq sisteminin inkişafı və hüququn aliliyinin təmin edilməsi istiqamətində görülən çoxşaxəli işlərin yüksək qiymətləndirilməsidir.

Azərbaycan Respublikasının müasir dövlət quruluşunda prokurorluq orqanları mühüm və strateji rol oynayır. Bu gün ölkəmizin hüquq mühafizə sistemi, yalnız hüquq pozuntularının qarşısını almaqla kifayətlənmir, həm də cinayətkarlıqla mübarizə, hüququn aliliyinin təmin edilməsi və vətəndaşların hüquqlarının müdafiəsi kimi vacib missiyaları yerinə yetirir. Bu baxımdan, prokurorluğun fəaliyyəti dövlətin idarəetmə strukturunun mühüm bir hissəsini təşkil edir və hüquqi dövlətin qurulmasında həlledici əhəmiyyətə malikdir.

Prokurorluq orqanlarının qarşısında duran əsas vəzifələrdən biri, qanunların pozulmasının qarşısını almaq və cinayətlərin araşdırılmasıdır. Həmçinin, dövlətin maraqlarını qorumaq, ədalətə xidmət etmək və hüquq sistemində şəffaflığı artırmaq kimi məsələlər də prokurorluğun gündəliyindəki ən vacib məsələlərdəndir. Prokurorluğun qarşısında duran bu mühüm vəzifələrin həyata keçirilməsi üçün güclü və bacarıqlı bir rəhbər çox vacibdir. Əminliklə deyə bilərik ki, Baş prokuror Kamran Əliyev bu çətin vəzifələrin öhdəsindən uğurla gəlir. O, uzun illər boyu hüquq sahəsində qazandığı zəngin təcrübə, peşəkarlıq və prinsipiallıq sayəsində prokurorluğu daha mütəşəkkil, səmərəli və şəffaf bir quruma çevirməyə müvəffəq olub. Onun rəhbərliyi altında, prokurorluq yalnız hüquq mühafizə orqanlarının deyil, həm də bütün dövlət idarəçiliyinin etibarlı dayaqlarından birinə çevrilib. Baş prokuror Kamran Əliyevin hərtərəfli idarəetmə bacarıqları və hüquq sahəsindəki dərin bilikləri Azərbaycan hüquq sistemində daha ədalətli və demokratik bir mühitin formalaşmasına böyük töhfələr verir.

Kamran Əliyevin rəhbərlik etdiyi prokurorluq, həm də cəmiyyətin hüquqi təfəkkürünün inkişafına, hüquqi maarifləndirmə işinin genişləndirilməsinə, cinayətkarlığın qarşısının alınmasına yönəlmiş təşəbbüslərlə diqqət çəkir. Onun, eyni zamanda, vətəndaşların hüquqlarının qorunmasına verdiyi önəm və hər zaman ədalətin bərpası istiqamətində atdığı addımlar öz sahəsindəki böyük nüfuzunu daha da möhkəmləndirir.

Kamran Əliyevin fəaliyyətinin Prezident tərəfindən yüksək qiymətləndirilməsi, onun yalnız hüquq mühafizə orqanları çərçivəsindəki işini deyil, həm də dövlətə və xalqa göstərdiyi genişmiqyaslı xidmətlərini təqdir edən bir addımdır. 1-ci dərəcəli "Vətənə xidmətə görə" ordeni ilə təltif edilməsi Kamran Əliyevin Azərbaycanın hüquq sisteminin inkişafına və dövlətin ümumi tərəqqisinə verdiyi dəyərli töhfələrin əsl qiymətləndirilməsidir. Bu təltif, həmçinin onun dövlətin idarəetmə prosesindəki mövqeyinin və müstəsna peşəkarlığının dövlət tərəfindən tanınmasıdır.

Ötən gün 60 illik yubileyini qeyd edən cənab Baş prokuror üçün bundan böyük bir hədiyyə ola bilməzdi.

E-huquq.az kollektivi olaraq, həm yubileyi, həm də təltif olunması münasibətilə Baş prokuror Kamran Əliyevi ürəkdən təbrik edirik! Gələcək fəaliyyətində uğurlar arzulayır, Azərbaycan hüquq sisteminin inkişafı yolunda yeni nailiyyətlər əldə etməsini diləyirik!

Cənab Baş pokurorun bu təltifi onun öz sahəsindəki müstəsna xidmətlərinin və zəhmətinin layiqli qarşılığı olaraq, həm də bütün hüquq mühafizə orqanları əməkdaşları üçün nümunə və ilham mənbəyidir!