Baş prokurorun müavini Fransada tədbirdə iştirak edib - FOTO


  • 21 Noyabr 16:46

Noyabrın 16-17-də Fransanın paytaxtı Paris şəhərində İqtisadi Əməkdaşlıq və İnkişaf Təşkilatının (OECD) Şərqi Avropa və Mərkəzi Asiya üzrə Anti-Korrupsiya Şəbəkəsi (ACN) tərəfindən Şərqi Avropa və Mərkəzi Asiya regionunda korrupsiyaya qarşı mübarizə sahəsində qərar-verənlərin Yüksək Səviyyəli iclası və Şəbəkənin Rəhbər Qrupunun 27-ci görüşü təşkil edilib.

Bu barədə e-huquq.az-a Azərbaycanın Baş Prokurorluğunun Mətbuat Xidmətindən məlumat verilib.

Bildirilib ki, qeyd edilən tədbirlərdə ölkəmiz Azərbaycanın Baş prokurorunun müavini - Baş prokuror yanında Korrupsiyaya qarşı Mübarizə Baş İdarəsinin rəisi Nazim Rəcəbovun rəhbərlik etdiyi, tərkibinə Baş İdarənin Preventiv tədbirlər və təhqiqat idarəsinin rəisi Səbuhi Alıyev və Təşkilati və informasiya təminatı idarəsinin rəis müavini İsfəndiyar Hacıyevin daxil olduğu nümayəndə heyəti tərəfindən təmsil olunub.

Qurumun noyabrın 16-da keçirilmiş Yüksək Səviyyəli iclası çərçivəsində baş tutan yüksək profilli və mürəkkəb korrupsiya cinayətlərinə qarşı hüquq-mühafizə orqanlarının səylərinin gücləndirilməsinə həsr edilmiş sessiyasında nümayəndə heyətinin rəhbəri Nazim Rəcəbov tərəfindən ölkəmizin korrupsiyaya qarşı mübarizə təcrübəsinə dair geniş məlumat verilib, eləcə də tədbir iştirakçılarının sualları cavablandırılıb.

Bununla yanaşı, noyabrın 17-də Şəbəkənin rəhbər qrupunun qarşılıqlı müzakirə formatında keçirilən 27-ci görüşündə Nazim Rəcəbov tərəfindən ölkəmizdə korrupsiyaya qarşı mübarizənin dövlət siyasətinin prioritet istiqamətlərindən birini təşkil etməsi vurğulanaraq Anti-Korrupsiya Şəbəkəsinin (ACN) növbəti İş Planı və Şəbəkəyə üzv ölkələrin 5-ci monitorinq mərhələsinin Azərbaycan tərəfindən tam dəstəklənməsi ifadə edilib.

Aparılan müzakirələr nəticəsində Şəbəkənin rəhbər qrupunun 27-ci görüşündə 2023-2026-cı illər üzrə iş planı, həmçinin üzv ölkələrdə korrupsiyaya qarşı mübarizə tədbirlərinin səmərəliliyinin dəyərləndirilməsi mexanizminin 5-ci mərhələsinin başlanması ilə bağlı müzakirələr aparılaraq müvafiq qərarlar qəbul edilib, habelə növbəti 3 il üçün Şəbəkənin sədri və müavini seçilib.

Oxşar xəbərlər