Məhkəmə DTX-nin həbs etdiyi sabiq icra başçısı ilə bağlı qərar verdi

Dövlət Təhlükəsizliyi Xidmətinin (DTX) keçirdiyi əməliyyat nəticəsində saxlanılan Qax Rayon İcra Hakimiyyətinin keçmiş başçısı Musa Şəkiliyev barəsində həbs qətimkan tədbiri seçilib.

E-huquq.az-ın xəbərinə görə, Səbail Rayon Məhkəməsində hakim Rəna Qafarovanın sədriliyi ilə keçirilən prosesdə istintaq orqanının vəsatətinə baxılıb.

Məhkəmənin qərarına əsasən, M.Şəkiliyev haqqında 4 ay müddətinə həbs qətimkan təbdiri seçilib.

Xatırladaq ki, iyunun 20-də DTX Qax Rayon İcra Hakimiyyətində əməliyyat keçirib və M.Şəkiliyevi saxlayıb. O, qulluq mövqeyindən istifadə etməklə xüsusilə külli miqdarda dövlət əmlakını mənimsəmə cinayətində ittiham olunur.

Prezident İlham Əliyevin iyunun 21-də imzaladığı sərəncamla Musa Şəkiliyev Qax Rayon İcra Hakimiyyətinin başçısı vəzifəsindən azad edilib.