Perinatal Mərkəzdəki yanğınla bağlı məhkəməyə şahidlər məcburi gətiriləcək

Respublika Perinatal Mərkəzində 7 körpənin öldüyü yanğınla bağlı ittiham olunan direktor və şöbə rəislərinin cinayət işi üzrə məhkəmənin növbəti iclası keçirilib.

E-huquq.az xəbər verir ki, Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə şahidlər ifadə veriblər.

Fövqəladə Hallar Nazirliyinin (FHN) əməkdaşı Mənsur Atakişiyev bildirib ki, təqsirləndirilən şəxsləri tanımır: “2023-cü ilin noyabr ayında həmin əraziyə təhkim edilmişəm, 2024-cü ilin yanvar ayında isə fəaliyyətə başlamışam. Hadisə baş verən gün, gecə saat 4-ün yarısı mənə məlumat daxil oldu və dərhal hadisə yerinə getdim. Ora tək getmişdim. Çatanda yanğınsöndürənlər artıq orada idilər. Ərazi mənə təhkim edildiyinə görə yanğınla bağlı məlumatı mənə vermişdilər. Hadisə yerinə çatanda yanğın artıq söndürülmüşdü. Mənim tərəfimdən hadisədən əvvəl mərkəzdə yoxlama aparılmamışdı. Yanğından sonra isə mərkəzdə yoxlama keçirdik, aşkar edilən nöqsanları məhkəməyə təqdim etdik və nəticədə cərimə təyin olundu”.

FHN-nin mütəxəssisi Tural Süleymanov ifadəsində bildirib ki, yanğın hadisəsindən sonra mərkəzdə baxış keçirib: “Mərkəzə çatanda soyutma işləri hələ başa çatmamışdı, buna görə bir müddət gözləməli oldum. İçəri daxil olanda da artıq meyitlər çıxarılmışdı. Baxış müstəntiqlə birgə həyata keçirildi. Hadisə yerindən müxtəlif nümunələr götürüldü - elektrik naqillərindən, kömürləşmiş materiallardan, cihazlardan və küveyzdən nümunələr alındı. İlkin baxış zamanı mütəxəssis kimi yanğının başvermə səbəbi barədə rəy bildirmişəm. Əgər siqnalizasiya sistemi və yanğınsöndürmə su kranları işlək vəziyyətdə olsaydı, yanğının qarşısını almaq mümkün olardı”.

Vəkil Akşin Səmədov, Təbriz Nəzirlinin məhkəmədə şahid qismində dindirilməsini istəyib.

Məhkəmə Akşin Səmədov barəsində məcburi gətirilmə qərarı çıxarıb.

Məhkəmənin növbəti iclası 15 dekabr tarixinə təyin edilib.

Qeyd edək ki, 2024-cü il yanvarın 9-da "Respublika Perinatal Mərkəzi" PHŞ-nin inzibati binasında yanğın baş verib.

Yanğınla bağlı Baş Prokurorluqda Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb. İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.
Bundan başqa, Mehriban Abasquliyevanın 27 dekabr 2022-ci il tarixdə Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.
Eyni zamanda istintaqla, Fövqəladə Hallar Nazirliyi tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapeya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.

Xatırladaq ki, cinayət işi üzrə zərərçəkmiş qismində "Respublika Perinatal Mərkəzi", Elçin Gülmalı oğlu Nəcəfov, Vaqif İntiqam Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıb.

Humay Eminqızı