Hakimlərin Seçki Komitəsinin üzvü hüquqşünaslara müraciət etdi

"Hakim vəzifəsinə namizədlərin seçilməsi prosesi fasiləsiz və tam şəffaf şəkildə, zəruri meyarlara əsaslanaraq davam etdirilir".

E-huquq.az-ın məlumatına görə, bunu jurnalistlərə açıqlamasında Hakimlərin Seçki Komitəsinin üzvü Elşanə Vəliyeva deyib.

Onun sözlərinə görə, bu gün test imtahanından müvəffəqiyyətlə keçmiş namizədlər üçün yazılı imtahan keçirilir: "İmtahanda 151 nəfər iştirak edir. Qaydalara uyğun olaraq Komitə tərəfindən qapalı iclasda cinayət və mülki sahələrə dair kazus tipli suallar hazırlanıb. Namizədlər müşahidəçilərin iştirakı ilə bu suallar arasından biri mülki, biri isə cinayət sahəsinə aid olmaqla iki kazus seçiblər. Daha sonra həmin kazuslar maddi və prosessual hüquq normalarına əsasən təhlil edilmələri üçün namizədlərə təqdim olunub".

E.Vəliyeva bildirib ki, imtahanın nəticələri ikiqat yoxlama əsasında qiymətləndiriləcək: "Toplanmış ballar ikiyə bölündükdən sonra 60-dan yüksək yekun nəticə göstərən və hər bir sahə üzrə ən az 40 bal toplayan namizədlər növbəti mərhələyə keçəcəklər".

O əlavə edib ki, müxtəlif mərhələlər üzrə namizədlərin seçimi davam edir: "Hazırda 109 namizəd üzrə müsahibə imtahanları yekunlaşıb və nəticələr yaxın günlərdə elan olunacaq. Nəticələr açıqlandıqdan sonra Komitə onların qiymətləndirilməsi və ixtisasa uyğunluğu barədə Məhkəmə-Hüquq Şurasına müvafiq rəy təqdim edəcək".

Komitə rəsmisi onu da qeyd edib ki, hakimliyə namizədlik üçün sənəd qəbulu mütəmadi olaraq davam edir və özünə güvənən hüquqşünaslar müsabiqəyə qoşulmağa dəvət olunur.

Şəbnəm Mehdizadə