Azərbaycanda arvadını öldürməkdə təqsirləndirilən şəxs hakim qarşısına çıxarılır

Bərdə rayonunda arvadını öldürməkdə şübhəli bilinən Təbriz Orucovun cinayət işi üzrə ibtidai istintaq başa çatıb.

E-huquq.az xəbər verir ki, toplanan materiallar araşdırılması üçün Gəncə Ağır Cinayətlər Məhkəməsinə göndərilib.

İşə hakim Nural Əliyevin sədrliyi ilə baxılacaq. Məhkəmənin hazırlıq iclası sentyabrın 8-nə təyin edilib.

Xatırladaq ki, mayın 25-i saat 09 radələrində Bərdə rayonu, Hacallı kənd sakini 1995-ci il təvəllüdlü Xasa Orucovanın yaşadığı evdə öldürülməsi barədə rayon prokurorluğuna məlumat daxil olub. Aparılmış ilkin araşdırmalarla zərərçəkmişin əri 1996-cı il təvəllüdlü Təbriz Orucovun şəxsi münasibətlər zəminində aralarında yaranmış mübahisə zamanı Xasa Orucovaya ov tüfəngindən atəş açaraq qəsdən öldürməsinə əsaslı şübhələr müəyyən edilib.

Faktla bağlı Bərdə rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. T. Orucov şübhəli şəxs qismində tutularaq istintaqa cəlb edilib.

Rəşid Qarayev