Anasını və qardaşının həyat yoldaşını bıçaqlamaqda təqsirləndirilən şəxs hakim qarşısına çıxarılır

Bərdədə anasına və qardaşının həyat yoldaşına xəsarət yetirməkdə təqsirləndirilən Hacıbala İsayevin cinayət işi üzrə ibtidai istintaq başa çatıb.

E-huquq.az-ın məlumatına görə, toplanan cinayət işi materialları baxılması üçün Gəncə Ağır Cinayətlər Məhkəməsinə göndərilib.

Hakim Abdulla Məmmədovun sədrliyi ilə keçiriləcək məhkəmənin hazırlıq iclasının vaxtı hələlik məlum deyil.

Qeyd edək ki, Bərdə rayonunun Güloğlular kəndi ərazisində qardaşının həyat yoldaşına və öz anasına bıçaqla xəsarət yetirən şəxs barəsində rayon polis şöbəsinə məlumat daxil olub. Cinayət əməlini törətməkdə şübhəli bilinən 1997-ci il təvəllüdlü Hacıbala İsayev saxlanılıb. Hadisənin ailə münaqişəsi zəminində baş verdiyi bildirilib. H.İsayevə qarşı Cinayət Məcəlləsinin 126.2.3-cü maddəsi ilə ittiham irəli sürülüb.

Şəbnəm Mehdizadə