"Dövlət hesabına hüquqi yardıma görə vəkilə ödənilən məbləğ azı 2 dəfə artırılmalıdır" - Hökumətə çağırış


  • 24 Noyabr 2021 12:40

"Həm büdcə və zərfə daxil olan sənədlərin müzakirə edildiyi, həm də hökumət üzvlərinin burda olmasından istifadə edib mən vəkilləri çox narahat edən bir məqamı sizinlə bölüşmək istəyirəm. Bu gün Vergi məsələsi kontekstində məsələyə baxırıqsa, deməliyəm ki, vəkilin vergi və ödəniş yükü çox ağırdır, ümumilikdə 34 faiz vergi və icbari ödəniş nəzərdə tutulur. Bu mənada digər peşə sahiblərinə tətbiq olunan yanaşma vəkilə də təmin olunmalıdır. Eyni zamanda vəkillərin pensiya təminatı ilə bağlı problemlər var. Əmək Pensiyaları haqqında qanunda prokurorluq, məhkəmə və s. orqanların pensiya təminatının yaxşılaşdırılması ilə bağlı güzəştlər nəzərdə tutulsa da, vəkilliyə münasibətdə nədənsə bu yanaşmanı görmürük".

E-huquq.az-ın məlumatına görə, bunu millət vəkili, Milli Məclisin Hüquq siyasəti və dövlət quruculuğu komitəsinin üzvü Bəhruz Məhərrəmov parlamentin plenar iclasında çıxışı zamanı deyib.

Deputat çıxışında dövlət hesabına hüquqi yardıma ayrılan vəsaiti yenidən gündəmə gətirib: "Əvvəl dövlət hesabına hüquqi yardım üçün vəkilə ödənilən məbləğ 2 manat idi. Cənab Prezident böyük humanistlik göstərərək 22 fevral 2018-ci il tarixli Sərəncamı ilə Nazirlər Kabinetinə bu məbləğin artırılmasını tapşırdı və hökumət də həmin ilin mayında bu vəsaiti 3 dəfə artırıb, 6 manata çatdırdı. Bir daha deyim ki, dövlət başçımız artımla bağlı konkret rəqəm ifadə etməmişdi, iradə çox konseptual idi və mahiyyəti ondan ibarət idi ki, artım ağlabatan olsun. Artırılan məbləğə nəzər yetirsək, faktiki olaraq xərcləri çıxanda dövlət hesabına hüquqi yardım prosesində vəkil nəinki qazanmır, əksinə, bəzən əlavə xərclərin altında qalır. Bu mənada hökumətdən xahiş edirəm, cənab Prezidentin iradə ifadəsini rəhbər tutaraq ödənişsiz hüquqi yardıma görə dövlət hesabına ödənilən məbləğə bir də baxsın. İndiki halda bu məbləğin azı 2 dəfə artırılması, habelə, dövlət hesabına yardımlar üzrə ödənilən vəsaitin vergi və ödənişlərdən azad edilməsi zərurətdir. Mən demirəm vəkil vergi verməsin, amma heç olmasa, dövlət hesabına yardım üzrə məbləğ vergidən azad olunmalıdır.

Vəkilin vergi yükünün azaldılması, dövlət hesabına hüquqi yardıma görə ödənişin vergidən azad edilməsi, vəkillərin pensiya təminatının vəkil adına layiq formada həlli xərc yox, bizim üçün yeni perspektivlər deməkdir. Çünki güclü vəkillik insan hüquq və azadlıqlarının səmərəli təmini, güclü ədalət mühakiməsi deməkdir. Güclü müstəqil vəkillik və müstəqil məhkəmə isə iqtisadi inkişaf, investisiyaların cəlbi üçün həlledici amillərdən biridir. Bu mənada mən hökumət üzvlərindən xahiş edirəm, bu problemə diqqət yetirilsin", - deyə deputat qeyd edib.

Spiker Sahibə Qafarova isə deyib ki, indi Milli Məclisin Hüquq siyasəti və dövlət quruculuğu komitəsinin sədri Əli Hüseynli ilə bu məsələni danışıb: “Əli müəllim dedi ki, yaxın vaxtlarda bu məsələ müzakirə ediləcək”.

Xəyalə Bünyatova

Oxşar xəbərlər