Vergi sahəsində ödəmə tapşırığında göstərilməyən bəzi məlumatlara görə maliyyə sanksiyası tətbiq ediləcək


  • 12 Yanvar 18:16

2022-ci il yanvarın 1-dən vergiödəyicisi olan şəxslər arasında ödəniş əməliyyatı aparılarkən əməliyyatı həyata keçirən banka və ya bank əməliyyatlarını həyata keçirən digər şəxslərə təqdim edilən ödəniş tapşırığının ödənişin təyinatı hissəsində konkret rekvizitlər üzrə bəzi məlumatlar göstərilməlidir.

Dövlət Vergi Xidmətindən e-huquq.az-a bildirilib ki, həmin məlumatlara bunlar daxildir: Vergiödəyicisi tərəfindən əldə edilmiş elektron qaimə-fakturalar üzrə alınmış mallar (işlər, xidmətlər) üzrə - elektron qaimə-fakturanın seriya və nömrəsi; təqvim ayı ərzində eyni vergiödəyicisindən müntəzəm və daimi əsaslarda alınan və elektron qaimə-fakturalar ilə rəsmiləşdirilən mallara (işlərə, xidmətlərə) görə ödəniş aparılarkən belə əməliyyatlar üzrə tərəflər arasında bağlanmış müqavilə və ya həmin müqaviləyə əlavənin tarixi və nömrəsi; xarici ticarət fəaliyyəti üzrə - yük gömrük bəyannaməsinin seriya və nömrəsi, işlərin və xidmətlərin alışı ilə bağlı hesab faktura (invoys) sənədinin tarixi və nömrəsi; borc ödəmələri üzrə - təyinatında borc ödənişi olduğu göstərilməklə tərəflər arasında bağlanmış borc müqaviləsinin və ya borcun ödənilməsinə dair tələbnamənin tarixi və nömrəsi; avans ödəmələri üzrə - təyinatında avans ödənişi olduğu göstərilməklə tələbnamənin, yaxud tərəflər arasında bağlanmış müqavilənin və ya həmin müqaviləyə əlavənin tarixi və nömrəsi.

Qeyd edilən məlumatları ödəmə tapşırığında göstərməyən və ya təhrif edilməklə göstərən vergiödəyicisinə hər belə ödəmə tapşırığına görə 100 manat məbləğində maliyyə sanksiyası tətbiq edilir.

Oxşar xəbərlər