Azərbaycan-ABŞ Strateji Tərəfdaşlıq Xartiyası yeni mərhələnin başlanğıcıdır - DEPUTAT

"Dünən imzalanmış "Azərbaycan-ABŞ Strateji Tərəfdaşlıq Xartiyası” ölkəmizin beynəlxalq mövqeyinin və regional rolunun yeni səviyyəyə yüksəlməsinin mühüm göstəricisidir".

Bunu e-huquq.az-a açıqlamasında Milli Məclisin deputatı Tahir Mirkişili deyib.

Onun sözlərinə görə, snəd bir daha təsdiq edir ki, Azərbaycan yalnız enerji ixracatçısı deyil, həm də Avrasiyanın strateji nəqliyyat, logistika və rəqəmsal mərkəzlərindən birinə çevrilir.

"Xartiyada Orta Dəhlizin inkişafı, regional bağlantılılığın gücləndirilməsi, ticarət və investisiya axınlarının artırılması kimi prioritetlərin açıq şəkildə vurğulanması ölkəmizin uzunmüddətli iqtisadi strategiyası ilə tam uzlaşır. Sənəddə xüsusilə diqqət çəkən məqamlar ABŞ-nin Azərbaycanın ərazi bütövlüyünə və suverenliyinə açıq dəstəyidir. Həmçinin, Transxəzər Nəqliyyat Dəhlizinin qlobal ticarət üçün əsas marşrut kimi tanınması, süni intellekt, rəqəmsal infrastruktur və innovasiya sahələrində əməkdaşlığın genişləndirilməsi, kibertəhlükəsizlik və yüksək texnologiyalar üzrə birgə təşəbbüslərin nəzərdə tutulması da bizim üçün mühümdür. Bu sənəd iqtisadi əməkdaşlığı yalnız ənənəvi sahələrdə deyil, gələcəyin iqtisadiyyatı olan rəqəmsal texnologiyalar, AI və innovasiyalar istiqamətində də yeni mərhələyə daşıyır. Eyni zamanda, özəl sektorun prosesə cəlb edilməsi Azərbaycanın biznes mühitinə beynəlxalq etimadın güclənməsi deməkdir", - deyə deputat qeyd edib.

O vurğulayıb ki, Strateji Tərəfdaşlıq Xartiyası Azərbaycanın cənab İlham Əliyevin rəhbərliyi ilə Azərbaycanın regional liderliyini möhkəmləndirən, yeni investisiya və inkişaf imkanları açan, gələcəyə yönəlmiş mühüm yol xəritəsidir.

Şəbnəm Mehdizadə