“Koronavirusa ilk yoluxma halı şəhər xəstəxanasından çıxarılan məhkumda rast gəlinib. Təmas halı orda baş verib. Bundan sonra bütün təmasların nəzarətdə saxlanılmasına başlanılıb”.
E-huquq.az-ın xəbərinə görə, bunu Ədliyyə Nazirliyi Tibb Baş İdarəsinin rəisi müavini İftixar Qurbanov onlayn müzakirədə deyib.
O bildirib ki, məhbuslar arasında yoluxma halı ictimaiyyətə mütəmadi çatdırılır.
“Məhbuslar arasında tək-tək yoluxma halı var. Koronavirusa yoluxma halı aşkarlandıqda dərhal karantin təmin olunur və həmin şəxsin müalicəsi və müayinəsi tətbiq olunur. Bugünkü günə qədər koronavirus yoluxmuş məhkumlar arasında vəziyyəti ağırlaşmış məhbus olmayıb, hamısı sağalıb”, – deyə İ. Qurbanov vurğulayıb.
Qeyd edək ki, ictimaiyyətin davamlı olaraq məlumatlandırılması məqsədilə Ədliyyə Nazirliyi tərəfindən onlayn müzakirələr təşkil olunur. "Facebook" səhifəsi üzərindən edilən canlı yayımlarda nazirliyin rəsmiləri ictimaiyyəti və KİV nümayəndələrini maraqlandıran sualları cavablandırırlar.
