Məhkəmənin qərarından sonra vəkil göz yaşlarını saxlaya bilmədi - VİDEO

Sumqayıt Apellyasiya Məhkəməsinin qərarı vəkilin duyğulu anlarına səbəb olub.

E-huquq.az xəbər verir ki, Vəkillər Kollegiyasının üzvü Vəfa Usubova müdafiə etdiyi şəxsin azadlığa buraxılması barədə qərardan sonra sevinc göz yaşlarını saxlaya bilməyib. Sosial şəbəkələrdə vəkilin məhkəmə zalında çəkilmiş görüntüləri geniş maraq doğurub.

Məsələ ilə bağlı saytımıza danışan vəkil deyib ki, Cinayət Məcəlləsinin 333.4-cü (Hərbi hissəni və ya xidmət yerini özbaşına tərk etmə) maddəsi ilə təqsirləndirilən şəxs barəsində Bakı Hərbi Məhkəməsi 2 il azadlıqdan məhrum etmə cəzası təyin edib. Lakin apellyasiya instansiyası bu qərarı ləğv edərək, şəxsi şərti azadlığa buraxıb.

"O, əslində çox vətənpərvər bir insandır. 2023-cü ilin 19-20 sentyabr tarixlərində Azərbaycan Ordusunun keçirdiyi antiterror əməliyyatlarında iştirak edib. Döyüş zamanı yaralanmış əsgər yoldaşını xilas etməyə çalışarkən özü də yaralanıb. Mən əlimdən gələni etdim ki, bu haqsızlığa son qoyulsun. Bu iş mənim üçün həm də şəxsi və emosional baxımdan xüsusi əhəmiyyət daşıyırdı. Çünki təqsirləndirilən şəxsin anası birinci qrup əlildir, atası isə onkoloji xəstədir. 2019-cu ildə Əmək və Əhalinin Sosial Müdafiəsi Nazirliyi tərəfindən 1-ci qrup əlil olan anasına baxan şəxs kimi təyin olunub. O, ailənin yeganə qazanc gətirəni idi, yeni ailə qurmuşdu. Hətta həbsindən qısa müddət sonra həyat yoldaşının hamilə olduğunu öyrəndi. Belə bir ağır vəziyyətdə onun həbsdə qalması təkcə hüquqi deyil, həm də mənəvi yük idi. Mən anasına söz vermişdim ki, oğlunu azadlığa qovuşduracağam. Şükür ki, səylərimiz nəticə verdi və məhkəmə ədalətli qərar çıxardı. O an göz yaşlarımı saxlaya bilmədim. Çünki bir insanın həyatını dəyişdirmək, onu ailəsinə qaytarmaq mənim üçün sadəcə peşə borcu deyil, həm də vicdan məsələsidir", - V.Usubova bildirib.