Ali Məhkəmədə qətl törətməkdə təqsirləndirilən Əli Əliyevin barəsində olan məhkəmə qərarından verilən kassasiya şikayətinə baxılıb.
E-huquq.az-ın xəbərinə görə, hakim Fərhad Kərimovun sədrliyi ilə keçirilən prosesdə qərar elan olunub.
Qərara əsasən, təqsirləndirilən şəxsin kassasiya şikayəti təmin edilməyib.
Qeyd edək ki, hadisə 2017-ci ilin aprel ayında Cəlilabad rayonu Sərhədabad kəndində baş verib. 1992-ci il təvəllüdlü, üçüncü qrup əlil Ə.Əliyev həmkəndlisi Nemət Astanovu qısqanclıq zəmnində qətlə yetirib.
Lənkəran Ağır Cinayətlər Məhkəməsinin hökmü ilə Ə.Əliyev 17 il 6 ay müddətinə azadlıqdan məhrum edilib. Hökmdən narazı qalan məhkum apellyasiya şikayəti verib. Şirvan Apellyasiya Məhkəməsi şikayəti təmin etməyib. Daha sonra o, kassasiya şikayəti ilə Ali Məhkəməyə müraciət edib.
