İngiltərədə varlılar üçün əlavə vergi gəlir

İngiltərənin Maliyyə Naziri Reyçel Rivz büdcə kəsirini azaltmaq və iqtisadiyyatı canlandırmaq məqsədilə ölkədəki varlı şəxslərə yönəlmiş yeni vergi islahatını elan edib. Gündəmə düşən bu addım xüsusilə lüks ev sahiblərinə təsir göstərəcək.

E-huquq.az xəbər verir ki, "The Telegraph" qəzetinin məlumatına görə, Xəzinədarlıq, lüks daşınmaz əmlak satışlarına tətbiq ediləcək yeni “mansion tax” (malikanə vergisi) və ya yüksək dəyərli evlər üçün illik əlavə vergi variantlarını müzakirəyə çıxarıb. Yeni vergi siyasəti, xüsusilə London və ölkənin cənub-şərq bölgələrindəki yüksək gəlirli ev sahiblərini hədəfləyəcək.

Beynəlxalq Valyuta Fondu (IMF) və Maliyyə Araşdırmaları İnstitutu (IFS) hökumətə mənzil satışları zamanı tətbiq edilən möhür rüsumunun ləğvini tövsiyə edib. Ekspertlərə görə, bu vergi əmlak sahiblərinin daşınmasını çətinləşdirir və iqtisadi fəallığı azaldır.

İngiltərə Xəzinədarlığı yüksək gəlirli mülklərdən toplanan vergi gəlirlərini artırmaq niyyətindədir. Bu çərçivədə, ölkədəki ən bahalı daşınmaz əmlaklar üçün yeni "bələdiyyə vergisi" (council tax) dərəcələrinin müəyyənləşdirilməsi və ya möhür və mövcud əmlak vergilərinin yerinə keçəcək illik daşınmaz əmlak vergisi tətbiqi məsələsi gündəmdədir.

Şəbnəm Mehdizadə