Ağ Ev: Zelenski və Putin müharibəni dayandırmağa hazır deyillər

Rusiya lideri Vladimir Putin və Ukrayna Prezidenti Volodimir Zelenski hələ ki, Ukraynada müharibəni dayandırmağa hazır deyillər.

E-huquq.az xəbər verir ki, bu barədə Ağ Evin mətbuat katibi Kerolayn Livitt bildirib.

Onun sözlərinə görə, ABŞ Prezidenti Donald Tramp Rusiyanın Ukraynaya qarşı müharibəsini bitirmək istəyir, lakin Putin və Zelenskinin də bunu istəməsi lazımdır.

"Hər iki tərəf hələ ki, müharibəni bitirməyə hazır deyil. Prezident Tramp onun bitməsini istəyir, lakin iki ölkənin liderləri də onu bitirmək istəməlidirlər. Prezident bu barədə əlavə açıqlamalar verəcək", - o deyib.

Livittin sözlərinə görə, Tramp Ukraynada hadisələrin gedişatından narazıdır, lakin buna təəccüblənmir.

"Söhbət çox uzun müddətdir müharibə vəziyyətində olan iki ölkədən gedir. Bu müharibəni Rusiya başladı. Eləcə də Ukrayna son vaxtlar Rusiyanın neft emalı zavodlarına zərbə endirib. Faktiki olaraq, onlar avqust ayı ərzində Rusiyanın neft emalı zavodlarının gücünün 20%-ni məhv ediblər", - o söyləyib.