Kanadanın bir əyalətində küçələrdə namaz qılmaq qadağan edilə bilər

Kanadanın Kvebek əyaləti ictimai yerlərdə dua etməyi və namaz qılmağı qadağan etməyi nəzərdə tutan yeni qanun layihəsi hazırlayır.

E-huquq.az xarici KİV-ə istinadən xəbər verir ki, əyalətin məsul naziri Jan-Fransua Roberj ötən cümə axşamı verdiyi açıqlamada bildirib ki, küçələrdə dua etməyin artması ciddi və həssas məsələdir. O, bu addımı Baş nazir Fransua Leqo tərəfindən verilən göstəriş əsasında atacaqlarını bəyan edib.

Baş nazir Leqo isə daha öncə verdiyi açıqlamada, “İnsanların küçədə və ya parklarda dua etməsini istəmirik. Dua etmək istəyən kilsəyə və ya məscidə gedə bilər, amma ictimai yerlərdə bu olmaz. Çox aydın bir mesaj vermək istəyirik”, - deyə bildirmişdi.

Kanada Müsəlman Forumu (CMF) bu cür qadağanın ifadə azadlığının pozulması olduğunu vurğulayıb. Qadağanın ictimai harmoniyaya zərər verə biləcəyi və müəyyən icmaların damğalanmasına səbəb olacağı bildirilir.

Kanada Mülki Azadlıqlar Assosiasiyası xəbərdarlıq edib ki, belə bir qanun dini azadlıq, ifadə azadlığı və dinc toplaşma hüququnu pozur.

Hökumətə bağlı dünyəvilik üzrə məsləhət komitəsinin ötən həftə dərc olunan 300 səhifəlik hesabatında ictimai yerlərdə duanın qadağan olunması tövsiyə edilməyib. Komitə belə məsələlərin yerli bələdiyyələrin səlahiyyətinə aid olduğunu qeyd edib.

Hesabatda eyni zamanda, dövlət dəstəyi ilə fəaliyyət göstərən uşaq bağçalarında çalışan erkən yaş tərbiyəçilərinin dini simvollar (simvollar daşıyan geyim və aksesuarlar) taxmasının qadağan olunması tövsiyə olunub.

Şəbnəm Mehdizadə