Keniyada turistin filin xortumuna spirt tökməsi böyük narazılığa səbəb oldu

Keniyada safari bölgəsində bir ispan turistin filin xortumuna spirtli içki tökməsi ciddi ictimai qəzəbə səbəb olub.

E-huquq.az xarici KİV-ə istinadən xəbər verir ki, sosial şəbəkələrdə yayılan görüntülərdən sonra həm Kenya Vəhşi Təbiət Xidməti (KWS), həm də özəl təbiət qoruqlarının rəhbərliyi təhlükəsizlik və etika qaydalarının pozulması ilə bağlı araşdırmaya başlayıb.

Görüntülərə görə, turist əvvəlcə içkidən bir qədər içib, sonra isə qalan hissəsini filin xortumuna töküb.

Hadisə "Instagram" platformasında paylaşılaraq qısa zamanda geniş yayılsa da, ictimai reaksiyalardan sonra görüntülər silinib.

BBC-nin təhlilinə əsasən, görüntülər Kenyanın Laikipia bölgəsində yerləşən "Ol Jogi" Təbiət Qoruğunda çəkilib. Qoruq əməkdaşlarından biri bildirib ki, bu cür davranışlara heç vaxt icazə verilmir. İnsanların fillərə yaxınlaşmasına belə icazə yoxdur.

Videodakı filin uzun və zədələnmiş dişi ilə tanınan "Bupa" adlı erkək fil olduğu müəyyən edilib. "Bupa", 1989-cu ildə Zimbabvedə həyata keçirilən kütləvi fil qırğınından xilas edilərək "Ol Jogi" qoruğuna gətirilib.

Kenya Vəhşi Təbiət Xidmətinin sözçüsü Pol Udoto hadisə ilə bağlı rəsmi istintaqın başlandığını bildirib.

Sosial şəbəkə istifadəçiləri isə turisti sərt şəkildə qınayaraq ölkədən deportasiya olunmasını tələb ediblər.

Turistin təbiət qoruğunda bir gərgədana kök yedirdiyi başqa bir paylaşımı da üzə çıxıb.

Məsul şəxslər bu davranışın da qoruma qaydalarına zidd olduğunu qeyd ediblər.

Bu insident, bir müddət əvvəl Maasai Mara bölgəsində köç edən vəhşi öküzlərin turistlər tərəfindən maneə ilə qarşılaşmasından sonra baş verib. Həmin hadisədən sonra Turizm və Vəhşi Təbiət Nazirliyi safari qaydalarının sərtləşdiriləcəyini, ziyarətçilərin yalnız icazəli ərazilərdə nəqliyyat vasitələrindən enə biləcəyini açıqlamışdı.

Keniya, hər il minlərlə turistin izlədiyi vəhşi təbiət köçləri və filləri ilə dünyanın ən önəmli təbii irs bölgələrindən biri hesab olunur. Hadisə isə həm ekoloji etikaya, həm də təbiətə hörmət məsələlərinə dair qlobal müzakirələri yenidən gündəmə gətirib.

Şəbnəm Mehdizadə