BMT: Yəməndə güclü yağışlar 46 mindən çox insana mənfi təsir edib

Birləşmiş Millətlər Təşkilatının Beynəlxalq Miqrasiya Təşkilatı (IOM) Yəməndə avqust ayının əvvəlindən etibarən təsirli olan şiddətli yağış və güclü fırtınaların 46 min 500-dən çox insanın həyatına mənfi təsir göstərdiyini açıqlayıb.

E-huquq.az xarici mətbuata istinadən xəbər verir ki, Təşkilatın yaydığı rəsmi bəyanatda qeyd olunur ki, güclü yağışlar nəticəsində evlər dağılıb, dolanışıq vasitələri məhv olub və onsuz da qeyri-sabit şəraitdə yaşayan minlərlə ailə yerindən köçmək məcburiyyətində qalıb.

IOM-un Yəmən üzrə missiya rəhbəri Abdusattor Esoev mövcud vəziyyəti daha əvvəl çox şeyini itirmiş ailələr üçün əlavə bir dağıdıcı zərbə kimi qiymətləndirib.

Esoev əlavə edib: “İnsanlar bir daha evsiz, əşyasızvə təhlükəsizlik hissindən məhrum qalıblar. Onların qorunmaya, yardıma və hər şeydən önəmlisi, beynəlxalq ictimaiyyətin dəstəyinə*ehtiyacları var”.

Uzun illərdir davam edən müharibə və siyasi qeyri-sabitlik fonunda Yəməndəki humanitar böhran getdikcə daha da dərinləşir. Son təbii fəlakət isə onsuz da məhdud resurslarla yaşayan əhali üçün vəziyyəti daha da ağırlaşdırıb.

BMT və əlaqədar qurumlar bölgədə təcili yardım və dəstək proqramlarını genişləndirmək üçün beynəlxalq yardıma çağırış edir.

Şəbnəm Mehdizadə