İstanbulda qeyri-qanuni miqrantlara qarşı genişmiqyaslı əməliyyat keçirildi

Türkiyənin İstanbul şəhərində miqrant qaçaqçılığı təşkilatçılarına və qeyri-qanuni miqrantlara qarşı polis tərəfindən genişmiqyaslı əməliyyat həyata keçirilib.

E-huquq.az Türkiyə mətbuatına istinadən xəbər verir ki, xüsusi təyinatlı polis qüvvələrinin dəstəyi ilə xaricə çıxmaq üçün "şok evi" kimi tanınan ünvanlarda gizlənən qeyri-qanuni miqrantlara qarşı əməliyyatlar aparılıb.

Əməliyyat çərçivəsində Zeytinburnu rayonunda ciddi təhlükəsizlik tədbirləri görülüb. Müəyyən edilmiş 3 ünvana basqın təşkil olunub və çox sayda qeyri-qanuni miqrant saxlanılıb.

Polis tərəfindən saxlanılan qeyri-qanuni miqrantların deportasiyası üçün zəruri hüquqi prosedurlar başladılıb.

Əməliyyat zamanı miqrantların gizləndiyi evlərdə ətraflı axtarış aparılıb. Rəsmilər, əməliyyatın təkcə Zeytinburnu ilə məhdudlaşmadığını, iki əlavə rayonu da əhatə edən sinxron basqınların həyata keçirildiyini bildiriblər.

Əməliyyatların qeyri-qanuni miqrasiya və insan alverinə qarşı mübarizə tədbirləri çərçivəsində davam etdiriləcəyi qeyd olunur.

Şəbnəm Mehdizadə