"Vaşinqton 14 günə cinayətdən azad zona olacaq" - ABŞ Prezidenti

Təhlükəsizliyi qorumaq və cinayət nisbətlərini azaltmaq üçün Vaşinqtonda "ictimai təhlükəsizlik fövqəladə vəziyyət" elan etdikdən sonra ABŞ Prezidenti Donald Tramp şəhərdə avtomobil qaçırma hallarının 87 faiz azaldığını açıqlayıb.

E-huquq.az xarici Kİ9V-ə istinadən xəbər verir ki, sosial şəbəkələrdəki paylaşımında Tramp Vaşinqtonda təhlükəsizliyin artırılması və cinayətin qarşısının alınması üçün verilən qərarları dəyərləndirib.

Fövqəladə vəziyyətdən sonra Vaşinqtonda avtomobil qaçırma hallarının 87 faiz azaldığını qeyd edən Tramp, paytaxtla bağlı verdiyi qərarlardan sonra bütün digər cinayət kateqoriyalarının da əhəmiyyətli dərəcədə azaldığını bildirib.

Tramp, “Vaşinqton cəmi 14 gün ərzində planlaşdırılandan çox daha sürətli cinayətdən azad zona olacaq”, - deyə bildirib.

Qeye edək ki, Tramp vəzifəyə gəldikdən sonra Vaşiqntonda yerli hökumətləri cinayət və evsizliklə mübarizədə uğursuzluqda ittiham edib.

Paytaxtda cinayət hallarının artdığını və şəhərin təhlükəsiz, təmiz və yaşanıla biləcək hala salınmalı olduğunu tez-tez dilə gətirən Tramp federal hökumətin şəhərin idarəçiliyini ələ almasını müdafiə edib.

Avqustun 11-də Tramp Vaşinqtonda təhlükəsizliyin təmin edilməsi və küçələri evsizlərdən təmizləmək kimi səbəblər irəli sürərək, Vaşinqton polis idarəsini federal nəzarətə götürüb və şəhərə təxminən 800 Milli Qvardiyaçı yerləşdirib.

Şəbnəm Mehdizadə