BMT rəsmisi: Avropada mənzil böhranı ifrat sağçıların yüksəlişinə təkan verir

BMT-nin mənzil hüququ üzrə xüsusi məruzəçisi Balakrishnan Rajagopal hesab edir ki, mənzil böhranı Avropada ifrat sağçıların yüksəlişinə töhfə verən ən böyük daxili siyasi problemdir.

E-huquq.az "Anadolu" agentliyinə istinadən xəbər verir ki, Avropa son 15 ildə dərinləşən mənzil böhranı ilə üzləşib. Bu müddət ərzində bütün qitədə kirayə qiymətləri təxminən 30 faiz artaraq bir çox ev təsərrüfatlarını gəlirlərinin təxminən yarısını mənzil almağa xərcləməyə məcbur edib.

Araşdırmalar göstərir ki, mənzil xərclərinin artması ilə ifrat sağçılara dəstək arasında birbaşa əlaqə var.

BMT-nin mənzil hüququ üzrə xüsusi məruzəçisi Rajaqopal məsələ ilə bağlı "Anadolu" agentliyinə danışıb.

Rajaqopal bildirib ki, yaşayış dəyərinin artması ifrat sağçıların yüksəlişinin yeganə səbəbi deyil: "Bu, əlbəttə ki, onu gücləndirir".

O, mənzil probleminin Avropada"ən böyük daxili siyasi problemə çevrildiyini bildirib və ifrat sağçıların yüksəlişini əsas siyasi partiyaların mənzil böhranını həll edə bilməməsi ilə əlaqələndirib.

Rajaqopal ifrat sağçıların ritorikasının uğurunun iqtisadi böhranlardan çox dərin irqçilikdən qaynaqlandığını vurğulayaraq, "Bu, yaşayışın baha olması ilə bağlı deyil, narahatlıqla bağlıdır. Onların öz ölkəmizdə bizi əvəz edəcəkləri qorxusu var", - deyə bildirib.

O qeyd edib ki, bu narahatlıq ifrat sağçı siyasətçilər tərəfindən istifadə olunur.

Mənzil böhranının daha konkret addımlarla həll oluna biləcəyini vurğulayan Rajaqopal problemin kökündə iki fundamental amilin dayandığını bildirib: "Torpaq çatışmazlığı və hüquqi müdafiənin olmaması".

Rajaqopal, xüsusən əhalinin sıx məskunlaşdığı şəhərlərdə torpağın çatışmazlığına diqqət çəkib və Avropa ölkələrini mənzilləri "konstitusion hüquq" kimi tanımağa və xüsusi mənzil nazirlikləri yaratmağa çağırıb.

O deyib ki, bir çox Avropa ölkələrində mənzil vətəndaşların konstitusiya hüququ deyil, dövlətin siyasət məqsədi hesab olunur.

"Mənzillə bağlı institusional çərçivədə ciddi çatışmazlıq var. Mənzil-tikinti nazirliklərinin bağlanması buna misaldır", - deyən Racaqopal əlavə edib ki, mənzilin hüquq deyil, əmtəə olması barədə yanlış fikir, təəssüf ki, aparıcı siyasi partiyalar tərəfindən təbliğ olunur.

Şəbnəm Mehdizadə