Səudiyyə Ərəbistanında güclü yağışlar selə səbəb oldu

Səudiyyə Ərəbistanında son günlərdə təsirli olan şiddətli yağışlar ölkənin bir çox bölgəsində daşqınlarasəbəb olub.

E-huquq.az xarici mətbuata istinadən xəbər verir ki, Necran, Cizan, Asir, Əl Baha, Məkkə və Mədinə də daxil olmaqla 10 bölgədə küçələr su altında qalıb, onlarla avtomobil sel sularına qərq olub.

Xüsusilə Asir bölgəsində yağışların şiddəti səbəbilə ani sel hadisələri qeydə alınıb. Küçələr tamamilə su altında qalıb, sakinlər çətin anlar yaşayıb. Sosial mediada yayılan görüntülərdə nəqliyyat vasitələrinin axınla sürükləndiyi, bəzi ev və obyektlərin su basdığı müşahidə olunub.

Səudiyyə Ərəbistanının Milli Meteorologiya Mərkəzi (NCM) bölgə əhalisinə vadilərdən və sel riski daşıyan ərazilərdən uzaq durmağı, mümkün qədər səyahətdən çəkinməyi tövsiyə edib.

Açıqlamada, yağıntıların sel, dolu, güclü küləklər, eləcə də toz və qum fırtınaları ilə müşayiət oluna biləcəyi qeyd olunub. Bəzi bölgələrdə bu səbəbdən görmə məsafəsinin azalacağı da vurğulanıb.

Hazırda yerli idarəetmələr və fövqəladə hallar xidmətləri selin fəsadlarını aradan qaldırmaq, təhlükədə olan vətəndaşlara yardım göstərmək üçün əraziyə cəlb olunub.

Yağıntıların növbəti günlərdə də bəzi bölgələrdə davam edəcəyi gözlənilir. Rəsmi qurumlar əhalini rəsmi xəbərdarlıqlara əməl etməyə və ehtiyatlı olmağa çağırır.

Şəbnəm Mehdizadə