"Melissa" qasırğası Yamaykada dağıntılara səbəb olub

Son illərdə Karib dənizində ən güclü fırtınalardan biri olan "Melissa" qasırğası Yamaykada həyatı iflic edib. Ölkənin müasir tarixində ən güclü qasırğa kimi qeydə alınan "Melissa" adada fırtınalara, daşqınlara və genişmiqyaslı dağıntılara səbəb olub.

E-huquq.az xarici KİV-ə istinadən xəbər verir ki, çərşənbə axşamı qasırğa qısa müddətə zəifləyib, lakin yenidən güclənib və saatda 209 kilometr küləklə 4-cü kateqoriya statusuna yüksəlib. Küləklər Yamayka sahillərinə çatmazdan əvvəl saatda 300 kilometrə çatıb. "Melissa" qasırğası hazırda Kuba və Baham adalarına doğru irəliləyir.

Yamayka Meteorologiya Xidməti hava şəraitinin gün ərzində əhəmiyyətli dərəcədə pisləşəcəyi barədə xəbərdarlıq edib. ABŞ Milli Qasırğa Mərkəzi dağıdıcı küləklər, qəfil daşqınlar və fırtına dalğalarının gözlənildiyini açıqlayıb.

Qasırğa ölkənin təxminən üçdə birində elektrik kəsintisinə səbəb olub, bir çox ərazidə ağaclar yıxılıb və damlar uçub.

Yamaykalı keçmiş senator İmani Duncan-Price deyib: "İnsanlar fırtınanın ortasında bir-birlərinə kömək etməyə çalışırlar ki, həyatlarını xilas etsinlər".

Ümumdünya Meteorologiya Təşkilatından (ÜST) Anne-Claire Fontan deyib: "Bu, Yamayka üçün əsrin fırtınası olacaq. Dörd metrə qədər fırtına dalğaları gözlənilir".

Yamaykanın Baş naziri Endryu Holness ölkənin dağıdıcı təsirlərlə üzləşdiyini bildirib: "Xəstəxanalara, yaşayış yerlərinə və ticarət obyektlərinə ciddi ziyan dəyib. Hələlik rəsmi ölüm xəbəri yoxdur, amma biz belə güclü fırtınadan insan itkisi gözləyirik".

Yamayka səhiyyə orqanları güclü yağış və daşqınlar səbəbindən timsahların yaşayış yerlərinə daxil ola biləcəyi barədə xəbərdarlıq edib.

Qasırğanın yolunda yerləşən Kubaya da xəbərdarlıq edilib.

Hakimiyyət orqanları külək və daşqından təsirlənən ərazilərdən 500 mindən çox insanın təxliyə edildiyini açıqlayıb.

Şəbnəm Mehdizadə