Kaliforniyada evin altında 200 kiloluq ayı aşkarlanıb

ABŞ-nin Kaliforniya ştatında yaşayış evinin altında 200 kiloluq ayı aşkar edilib.

E-huquq.az xarici KİV-ə istinadən xəbər verir ki, Altadenada yaşayan Conson adlı şəxs zibil qutularının aşması və həyətindəki kərpiclərin yerindən çıxarılmasından sonra şübhələnib, ona görə də hərəkət aşkarlayan təhlükəsizlik kameraları quraşdırıb.

Görüntülərdə nəhəng ayının 75 santimetr enində dar bir döşəmə boşluğuna girib-çıxdığı görünür. Ayının zibil qutularını axtarıb kərpicləri çıxarması da qeydə alınıb. Məlum olub ki, o, iyun ayından bəri evinin altında yaşayır.

"Mən burada tez-tez vəhşi heyvanlar görürəm, amma əvvəllər döşəmə boşluğumun söküldüyünü heç vaxt görməmişəm", - Conson deyib.

O əlavə edib ki, cümə günü kamerasının batareyasını dəyişdirməyə çalışarkən ayının nərildədiyini eşidib: "Harada olduğunu bilməmək dəhşətlidir".

"Mətbəxin altından səslər gələndə çox əsəbiləşirəm", - deyə o bildirib.

Kaliforniya Balıq və Vəhşi Təbiət Departamenti ilə əlaqə saxlayan Conson bildirib ki, ona yalnız veb formaya yönləndirilib və heç bir dəqiq cavab verilməyib. O, rəsmi müraciətini bazar ertəsi səhər təqdim edib.

Conson ayının sakitləşdiriləcəyinə və daşınacağına ümid etdiyini, lakin bunun mümkünsüz göründüyünü deyib. Hələlik o, bunu özü həll etməli olduğunu düşünür. O, ayını şirin çörəklərlə cəlb etməyi və sonra boşluğu bibər qazı ilə isladılmış qum torbaları ilə bağlamağı planlaşdırır.

Şəbnəm Mehdizadə