Cənub-Şərqi Asiyadakı təbii fəlakətlər 1200 insanın həyatına son qoyub

Cənub-Şərqi Asiyadakı fəlakətlər təxminən 1200 insanın həyatına son qoyub.

E-huquq.az xarici KİV-ə istinadən xəbər verir ki, iyun və sentyabr ayları arasında Cənubi və Cənub-Şərqi Asiyada güclü musson yağışları hər il böyük təbii fəlakətlərə və qəzalara səbəb olur.

Bu il bölgədə həftələrlə davam edən güclü yağışlar böyük humanitar böhrana çevrilib.

İndoneziya, Şri-Lanka, Tayland və Malayziyadakı fəlakətlərdə təxminən 1200 nəfər həlak olub, milyonlarla insan didərgin düşüb. Bölgə ölkələri ardıcıl fəlakətlərdən sonra yüzlərlə itkin düşmüş insanın axtarış və xilasetmə işlərini davam etdirsə də, itkilər hər gün artır.

Fəlakət bölgələrində infrastruktur ciddi şəkildə zədələndiyindən, bir çox icmalar əraziyə daxil ola bilmir və hökumətlər təxliyə, qida və səhiyyə dəstəyini sürətləndirmək üçün fövqəladə vəziyyət elan edir.

Lakin itkin düşmüş insanların çox olması ölənlərin sayının daha da arta biləcəyi ilə bağlı narahatlıqlar yaradır.

İndoneziyanın Sumatra adasında günlərlə davam edən güclü yağış daşqınlara və torpaq sürüşmələrinə səbəb olub. Hakimiyyət orqanları ölənlərin sayının 604-ə çatdığını, 464 nəfərin itkin düşdüyünü açıqlayıb. Bölgədə yollar, körpülər dağılıb və bəzi yaşayış məntəqələrinə giriş tamamilə kəsilib. Quru yolu ilə əlçatmaz ərazilərə helikopterlər vasitəsilə humanitar yardım çatdırıldığı bildirilir. Yaralananların sayı 646-ya çatıb və minlərlə insan müvəqqəti sığınacaqlara yerləşdirilib. Ölənlərin sayının daha da arta biləcəyi ilə bağlı narahatlıqlar var.

Şri-Lankada güclü yağışlar bir çox ərazidə torpaq sürüşmələrinə və qəfil daşqınlara səbəb olub. Bu günə qədər ölkədə 366 nəfər ölüb, 367 nəfər isə itkin düşüb. Hakimiyyət orqanları fəlakətdən təxminən 1 milyon insanın zərər çəkdiyini açıqlayıb. Axtarış-xilasetmə qruplarının daşqın və torpaq sürüşməsi riski olan bir çox əraziyə çatmaqda çətinlik çəkdiyi də vurğulanıb. Davam edən axtarış-xilasetmə əməliyyatları zamanı Şri-Lanka Hərbi Hava Qüvvələrinə məxsus helikopter qəzaya uğrayıb. Qəza nəticəsində pilot həlak olub, daha dörd nəfər yaralanıb. Şri-Lanka prezidenti Anura Kumara Dissanayake güclü yağışların vurduğu genişmiqyaslı ziyana görə ölkə miqyasında fövqəladə vəziyyət elan edib. Dissanayake axtarış və xilasetmə işlərinə dəstək olmaq üçün 20.000-dən çox hərbi qulluqçunun yerləşdirilməsini əmr edib.

Taylandın cənubunda güclü yağışların yaratdığı daşqınlarda 170 nəfər ölüb. Daşqınlardan 1,4 milyondan çox ev təsərrüfatı və 3,8 milyondan çox insan zərər görüb. Noyabrın 26-da Taylandın Baş naziri Anutin Çarnvirakul daşqınlar səbəbindən Sonqxla əyalətində fövqəladə vəziyyət elan edib. Çarnvirakul hökumətin daşqınlardan zərər çəkənlərə kompensasiya ödəyəcəyini və müxtəlif yardım tədbirləri həyata keçirəcəyini açıqlayıb.

Malayziyanın 7 ştatına təsir edən güclü yağışların yaratdığı daşqınlardan təxminən 11.000 insan zərər çəkib. Güclü yağışların yaratdığı daşqınlar Kelantan, Penanq, Perlis, Perak, Selangor, Kedah və Terengganu əyalətlərini vurub. Rəsmilər bildiriblər ki, Kelantan ən çox zərər çəkən ştat olub və 3022 ailədən 8248 nəfər müvəqqəti yardım mərkəzlərində qalıb.

Şəbnəm Mehdizadə