Sızanağa qarşı dərmanlar şizofreniya riskini 30 faiz azaldır

Şotlandiyanın Edinburq Universitetinin rəhbərlik etdiyi yeni bir araşdırma sızanaq müalicəsində geniş istifadə olunan doksisiklin ilə şizofreniyanın inkişafı arasında mümkün əlaqəni araşdırıb.

E-huquq.az xarici KİV-ə istinadən xəbər verir ki, araşdırma çərçivəsində Finlandiyada 1987-1997-ci illər arasında doğulmuş və yeniyetməlik dövründə psixi sağlamlıq xidməti almış 56 000-dən çox insanın sağlamlıq məlumatları təhlil edilmişdir.

Tədqiqat, yeniyetməlik dövründə doksisiklin istifadə edən gənclərin digər antibiotiklərdən istifadə edənlərlə müqayisədə yetkinlik dövründə şizofreniya diaqnozu qoyulma riskinin təxminən 30 faiz daha az olduğunu müəyyən edib.

Əldə edilən nəticələr müşahidə məlumatlarına əsaslanır, ona görə də doksisiklin şizofreniya xəstəliyinin qarşısını aldığını söyləmək olmaz.

Tədqiqatçıların fikrincə, dərman immun reaksiyalara, iltihaba və hüceyrə ölümü proseslərinə təsir etdiyi üçün sinir sisteminin inkişafında rol oynaya bilər.

Araşdırma həmçinin təsdiq edib ki, yeniyetməlik dövründə psixiatriya xidmətinə müraciət edən fərdlərin sonrakı həyatlarında psixoz inkişaf riski daha yüksəkdir.

Doksisiklin kimi tetrasiklin sinfinə aid bir antibiotik olan minosiklinlə bağlı əvvəlki tədqiqatlar göstərib ki, beyindəki sinaptik əlaqələrin həddindən artıq budamasını azaldır.

Tədqiqat "American Journal of Psychiatry" jurnalında dərc olunub. Alimlər vurğulayırlar ki, tapıntılar yeni müalicə strategiyalarına işıq sala bilər, lakin onların klinik praktikaya tətbiq olunması üçün daha çox iş görülməlidir.

Humay Eminqızı