Son 10 ildə 62 min Afrika pinqvini aclıqdan ölüb

Cənubi Afrika sahillərində son on ildə təxminən 62 min Afrika pinqvininin aclıqdan öldüyü məlum olub.

E-huquq.az xarici mətbuata istinadən xəbər verir ki, yeni elmi araşdırma iqlim dəyişikliyi və intensiv balıqçılıq fəaliyyətlərinin pinqvin populyasiyasını cəmi səkkiz il ərzində təxminən 95 faiz azaltdığını ortaya çıxarıb.

Ekseter Universitetinin bioloqu Riçard Şerlinin sözlərinə görə, vəziyyət yalnız Cənubi Afrika ilə məhdudlaşmır, son 30 il ərzində Afrika pinqvinlərinin qlobal populyasiyası təxminən 80 faiz azalıb.

Afrika pinqvinləri ildə təxminən 20 gün quruya çıxaraq tük əridirlər. Bu dövr ərzində qida qəbul edə bilmədikləri üçün əvvəlcədən kifayət qədər yağ ehtiyatı toplamaları həyati əhəmiyyət daşıyır. Lakin 2004-2011-ci illərdə onların əsas qida mənbəyi olan sardina ehtiyatları əvvəlki pik səviyyəsinin təxminən 25 faizinə düşüb.

Şerli bildirib ki, pinqvinlər tük əridən ərəfədə və ya bu dövrdən dərhal sonra kifayət qədər qida tapa bilmədikdə sağ qalma ehtimalları kəskin şəkildə azalır. Kütləvi ölümlər quruya yansımadığı üçün bu halların əksəriyyətinin dənizdə baş verdiyi qeyd olunub.

Həmin dövrdə Afrika pinqvinləri üçün ən vacib iki çoxalma bölgəsində genişmiqyaslı aclıq müşahidə olunub və nəticədə 62 min yetkin fərd tələf olub.

Ekoloq Robert Krouford və Keyptaun Meşəçilik, Balıqçılıq və Ətraf Mühit Departamentinin komandası müəyyən edib ki, sardina ehtiyatlarının azalmasının başlıca səbəbi iqlim dəyişikliyinin yaratdığı su temperaturu və duzluluq dəyişiklikləridir. Bundan əlavə, yüksək balıqçılıq təzyiqinin də vəziyyəti ağırlaşdırdığı vurğulanıb.

Şerli qeyd edib ki, yetkin pinqvinlərin sağ qalması, xüsusilə də illik tük dəyişmə dövründə ovun mövcudluğundan birbaşa asılıdır. Onun sözlərinə görə, 2006-cı ildə sardina ehtiyatlarının 80 faizə qədər ovlanması, iqlim təsirlərinə əlavə olunaraq ölüm hallarını daha da artırıb.

Afrika pinqvinləri 2024-cü ilə qədər 10 000-dən az cütləşən cütlüyün qalması səbəbilə nəsli kəsilməkdə olan növlər siyahısına daxil edilib. Mütəxəssislər xəbərdarlıq edirlər ki, mövcud tendensiya davam edərsə, növlərin növbəti 10 ildə tamamilə yox olma riski var.

Tədqiqat “Ostrich” elmi jurnalında dərc olunub.

Şəbnəm Mehdizadə