Böyük Britaniyada meymun çiçəyi virusunun yeni variantı aşkar edilib

Böyük Britaniyada meymun çiçəyi (MPOX) virusunun yeni variantı aşkar edilib.

E-huquq.az xarici KİV-ə istinadən xəbər verir ki, bu barədə Böyük Britaniyanın Səhiyyə Təhlükəsizliyi Agentliyi məlumat yayıb.

Məlumata görə, yeni ştam bu yaxınlarda Asiyaya səyahət etmiş bir insanda aşkar edilib.

Mütəxəssislər deyirlər ki, bu hadisə virusun qlobal miqyasda yayıldığını və təkamül etdiyini göstərir.

Virusun yeni növü yaxın təmas yolu ilə ötürülür. Xəstəlik öskürək və asqırma, həmçinin cinsi əlaqə yolu ilə yayıla bilər. Mütəxəssislərin fikrincə, xəstəlik qripə bənzər simptomlarla başlayır. Üşümə, zəiflik, əzələ və bel ağrıları dəridə qabarcıqlar, ləkələr və ya xoralar kimi görünə bilən səpgilərlə müşayiət oluna bilər.

MPOX bir çox insanlarda yüngül keçə bilər, lakin bəzi hallarda ağır xəstəliyə səbəb ola bilər. Peyvənd ağır xəstəliklərdən qorunmaq üçün təsirli bir üsuldur.

ABŞ-nin Emori Universitetindən Dr. Boghuma Titanji bildirib ki, yeni variantın ortaya çıxması narahatlıq doğurur. Titanji virusun ötürücülüyünün və patogenliyinin dəyişib-dəyişməyəcəyini yaxından izləməyin vacibliyini vurğulayıb.

Şəbnəm Mehdizadə