Yaponiyada nəhəng tuna balığı 3.2 milyon dollara satılıb

Yaponiyanın paytaxtı Tokionun Toyosu balıq bazarında nəhəng tuna balığı 3.2 milyon dollara satılıb.

E-huquq.az xarici KİV-ə istinadən xəbər verir ki, 243 kiloqramlıq nəhəng mavi üzgəcli tuna balığı 510 milyon yenaya (təxminən 3,2 milyon ABŞ dolları) satılaraq yeni rekord müəyyən edib.

Bazar ertəsi keçirilən ənənəvi Yeni il hərracında ən yüksək təklifi "Sushi Zanmai" restoranlar şəbəkəsinin sahibi Kiyoşi Kimura verib. Kimura bununla 2019-cu ildəki 2,1 milyon dollarlıq əvvəlki rekordunu da geridə qoyub.

Məlumata görə, balıq Yaponiyanın şimalındakı Oma sahillərində tutulub. Bu bölgə ölkədə ən keyfiyyətli mavi üzgəcli tuna balıqlarının istehsalı ilə tanındığı üçün hərrac iştirakçıları arasında xüsusi marağa səbəb olub.

Hesablamalara əsasən, balığın bir kiloqramının qiyməti təxminən 2,1 milyon yenə (təxminən 13 360 dollar) bərabər olub.

Qeyd edək ki, Yeni ilin ilk hərracları Yapon mədəniyyətində uğur və bolluq rəmzi sayılır. Bu səbəbdən alıcılar çox vaxt məhsulun real bazar dəyərindən xeyli yüksək məbləğlər təklif edir və bu alışları həm də əhəmiyyətli marketinq fürsəti kimi qiymətləndirirlər.

Hərracdan sonra nəhəng tuna balığı "Sushi Zanmai" restoranına aparılıb. Balıq restoran menyusunda adi qiymətlərlə təqdim olunacaq.

Şəbnəm Mehdizadə