İdrak qabiliyyətləri ilə elm dünyasında tanınan, Çin hərflərini və ingilis əlifbasını tanıya bilən məşhur şimpanze Ai 49 yaşında dünyasını dəyişib.
E-huquq.az xarici KİV-ə istinadən xəbər verir ki, Yaponiyanın Kyoto Universiteti Ainin qocalıqla bağlı orqan çatışmazlığı səbəbiylə cümə günü vəfat etdiyini açıqlayıb.
Yapon dilində adı "sevgi" mənasını verən Ai 1977-ci ildə Qərbi Afrikadan Yaponiyaya gətirilib. Primatoloq Tetsuro Matsuzavanın apardığı araşdırmalarda Ai idrak qabiliyyətləri ilə dünyanı heyran edib.
Ai-nin akademik nailiyyətləri yalnız dillərlə məhdudlaşmaypıb.
O, 100-dən çox Çin simvolunu və bütün ingilis əlifbasını tanıya bilirdi.
O, 0-dan 9-a qədər ərəb rəqəmlərini və 11 müxtəlif rəngləri ayırd edə bilirdi.
Kyoto Universitetinin tədqiqatçıları Ainin tədqiqatlarda fəal iştirak etdiyini bildiriblər.
Ai-nin həyatı boyu əldə etdiyi nəticələr Nature kimi nüfuzlu elmi jurnallarda dərc olunub və çoxsaylı sənədli filmlərdə nümayiş etdirilib.
Şəbnəm Mehdizadə
