Səudiyyə Ərəbistanında mumiyalanmış çita qalıqları aşkar edilib

Səudiyyə Ərəbistanının şimalındakı mağaralarda mumiyalanmış çita qalıqları aşkar edilib.

E-huquq.az xarici KİV-ə istinadən xəbər verir ki, Arar şəhəri yaxınlığındakı ərazidə aparılan qazıntılar zamanı 7 çita mumiyası ilə yanaşı, daha 54 çitanın da sümükləri aşkar edilib.

Təbii olaraq qorunub saxlanılan bu iri pişik mumiyaları dumanlı gözləri və büzüşmüş əzaları ilə qurumuş qabıqlara bənzəyir. İtaliyanın Florensiya Universitetinin professoru Joan Madurell-Malapeira 130 ildən 1800 ilə qədər yaşı olan bu qalıqların bölgənin vəhşi təbiət tarixi haqqında ətraflı məlumat verdiyini söyləyib.

Communications Earth and Environment jurnalında dərc edilən araşdırmaya görə, bu pişiklərin necə mumiyalandığı dəqiq məlum deyil. Ancaq mağaraların həddindən artıq quru şəraiti və sabit hava istiliyinin cəsədlərin çürüməsinin qarşısını aldığı, təbii mumiyalaşma prosesinin getdiyi ehtimal olunur.

Səudiyyə Ərəbistanı Milli Vəhşi Təbiət Mərkəzinin tədqiqatçısı Əhməd Buq, bu bölgədə belə təmiz dəlillərin tapılmasının mühüm olduğunu söyləyib.

Alimlər təbii yolla mumiyalanmış böyük pişiklər üzərində əsaslı genetik analiz aparıblar.

Məlum olub ki, bu qalıqlar Asiya və Şimal-Qərbi Afrikadakı müasir çitalara daha çox bənzəyir.

Şəbnəm Mehdizadə