UNICEF rəsmisi: Qəzzada atəşkəsə baxmayaraq 100-dən çox uşaq öldürülüb

2025-ci ilin oktyabr ayında əldə edilmiş atəşkəsə baxmayaraq, Qəzzada 100-dən çox uşaq öldürülüb.

E-huquq.az xəbər verir ki, bu barədə BMT-nin Uşaq Fondunun (UNICEF) icraçı direktorunun müavini Ted Çayban məlumat verib.

O bildirib ki, Qəzzada 100 min uşaq hələ də qida çatışmazlığından əziyyət çəkir və Qəzzaya humanitar yardımların daxil olmasına baxmayaraq bu yardımların ehtiyacları qarşılamaq üçün hələ də kifayət etmir.

Çayban qeyd edib ki, Qəzzada 1,6 milyondan çox insan təmiz içməli su ilə təmin edilib, 700 min nəfərə isə qış geyimləri paylanıb.

O, həmçinin Qəzzadakı Əl-Şifa Xəstəxanasında uşaq reanimasiya xidmətlərinin bu yaxınlarda yenidən açıldığını və çoxlu sayda uşağın peyvənd edildiyini açıqladı.

UNİCEF rəsmisi 1,3 milyon insanın adekvat sığınacağa ehtiyacı olduğunu vurğulayaraq, insanların çadırlarda və bombalanmış binalarda yaşadığını, beləliklə də şiddətli yağış, güclü külək və dondurucu temperatura məruz qaldığını bildirib.

Çayban qeyd edib ki, qışın əvvəlindən ən azı 10 uşaq hipotermiyadan ölüb.

UNİCEF rəsmisi İsrail rəsmilərindən humanitar yardım və kommersiya mallarının daşınması üçün daha çox marşrut açılmasını tələb etdiklərini əlavə də bildirib.

Şəbnəm Mehdizadə