NASA-nın Aya uçuş missiyası yenə təxirə salındı

NASA Ay raketindəki helium sızması səbəbindən mart ayı üçün planlaşdırılan buraxılış tarixini təxirə salıb.

E-huquq.az xarici mətbuata istinadən xəbər verir ki, raketin təmir olunmaq üçün anqara qaytarılması nəzərdə tutulub və aprel ayında dörd astronavtla ilk uçuşunun gerçəkləşəcəyi gözlənilir.

NASA-nın Artemis II missiyası, yarım əsr sonra insanları Aya göndərmə məqsədi ilə həyata keçirilir və hələ də texniki maneələrlə üzləşməkdə davam edir. Ötən həftə cümə axşamı, mühəndislər raketin hidrogen sızması problemini həll etsələr də, bu dəfə helium sistemində nasazlıq aşkar edilib. Helium sistemi mühərrikləri təmizləmək və yanacaq çənlərinə təzyiq vermək üçün kritik əhəmiyyət daşıyır.

Bu nasazlıq raketin buraxılış meydançasından çıxarılmasına səbəb olub. NASA nasazlığın dəqiq səbəbini müəyyən etmək və təmir işlərini aparmaq məqsədilə raketi çərşənbə axşamı günü Kennedi Kosmik Mərkəzindəki anqara geri daşıyacaq.

Əvvəlcə 6 mart tarixində planlaşdırılmış buraxılış yeni texniki problem səbəbindən aprelə təxirə salınıb. NASA buraxılış üçün yalnız bir neçə günlük uyğun "pəncərələrin" mövcud olduğunu vurğulayır. Buna görə də təmirin sürəti yeni buraxılış cədvəlini müəyyən edəcək.

Dörd nəfərlik astronavt heyəti üç amerikalı və bir kanadalıdan ibarət olub. Bu komanda, 1972-ci ildən bəri Apollo proqramı çərçivəsində Ay ətrafında səyahət edən ilk insanlar olacaq.

Şəbnəm Mehdizadə