Braziliyada leysan yağışlar nəticəsində ölənlərin sayı 46-ya çatıb

Braziliyada 23 fevraldan bəri davam edən leysan yağışlar nəticəsində ölənlərin sayı 46-ya çatıb.

E-huquq.az xarici KİV-ə istinadən xəbər verir ki, Minas Gerais Dövlət Yanğından Mühafizə İdarəsi Juiz de Fora və Uba şəhərlərində baş verən daşqınlardan sonra axtarış-xilasetmə əməliyyatlarının davam etdiyini açıqlayıb.

Bəyanatda ölənlərin sayının 46 olduğu, 21 nəfərin isə hələ də itkin düşdüyü bildirilib.

Yerli hakimiyyət orqanları daşqınlardan ən çox təsirlənən Juiz de Fora şəhərində yaşayan 3600 insanın yüksək risk səbəbindən evlərini tərk etmək məcburiyyətində qaldığını qeyd edib.

Meteoroloji proqnozlar leysan yağışların davam edəcəyini göstərir və hakimiyyət ictimaiyyəti tədbir görməyə çağırıb.

Minas Gerais qubernatoru Romeu Zema yerli mediaya verdiyi açıqlamada prioritetlərinin daşqınlardan zərər çəkənlərə humanitar yardım çatdırmaq olduğunu bildirib və əlavə edib ki, regionun yenidən qurulması üçün mərkəzi hökumətlə əməkdaşlığa hazırdırlar.

Eyni zamanda, Luiz Inacio Lula da Silva administrasiyası daşqınlar nəticəsində evsiz qalanlar üçün yeni yardım paketinin bələdiyyələrə paylanacağını açıqlayıb.

Humay Eminqızı